Orfanatu Laga

Sabado, 25-06-2022

Ohin loron Sabado mais ou menus tuku 3:15 lokraik, Orfaun sira iha Beata Laura Vicuña Laga, Simu ho laran haksolok visitantes sira husi nain ulun Portugal: Sua Exelencia Secretario Estado de Portugal Senhor Gabriel Bastos, Sua Exelencia Embaixadora de Portugal, Senhora Manuela Bairos e Comitiva no nain ulun Timor- Leste: Exelentissimo Director Geral do Ministerio Solidariedade Sosial de Inclusao e Comitiva. Agenda ba Recepsaun fahe ba parte tolu. Primeiro: hananu musica Bemvindo iha lian Portugues, Segundo:Tara tais no Terceiro: dansa uma adat ka dansa kultura nebe hatudu sinal tradisaun Timor nian. Remata dansa, aproveita kedas oportunidade hodi hasai foto hamutuk hanesan babain. Tuir mai, bainaka importante sira halo enkontro badak ho Irman Ligia Sarmento FMA,(Responsavel Geral ba orfanato), iha dada lia nee Irman esplika ba bainaka sira kona ba situasaun no kondisaun labarik sira nebe hela iha orfanato refere.

Molok bainaka sira remata sira nia visita, labarik sira ho ksolok hato’o sira nia agradesementu ba Visitantes sira ho knananuk no husi sira nia liafuan agradesementu badak. Iha mensajen agradesementu labarik sira nian hakerek: “Obrigado barak ba ita boot sira nia visita iha loron ohin. Ami hotu sente haksolok tebes tanba ita boot sira nia visita mak hanesan Maromak nebe haruka Ninia anju nain tolu ba visita Abrao iha tempu uluk. Sira lori bensaun ba Abrao ninia familia. Nunee mos ohin ami laran metin katak visitasaun ida nee mak nudar bensaun no esperansa ba ami nia futuru, tan nee ami hakarak agradese husi fuan ba ita boot sira nia Generosidade nebe kontinua tulun no suporta ami idai-dak iha ami nia prossesu aprendizajen nian” Visitantes sira orgulho no apresia prezensa labarik sira nian iha momentu nee. Depois de labarik sira nia apresentasaun agradesementu nian, Visitantes sira remata sira nia visita iha fatin refere.

(Agostinha Magno FMA)