”Ignorância das Escrituras, ignorância de Cristo” (S. Jerónimo)

Domingu loron 24 Setembru 2017, Família Paulina propoin atu selebra “Loron Mundiál Maromak nia liafuan nian”. Proposta ne’e sira hato’o iha 27 Maiu durante Festval Bíbliku iha Vicenza (Itália). Sira hili loron 24 Setembru tanba ne’e mak loron S. Jerónimo nian, Doutór no Padre Igreja nian, ne’ebé tradús ba lia-latin Sagrada Eskritura.

Papa Francisco nia sujestaun iha Surat “Misericordia et misera”

Kongregasaun Paulina no Comunità di Sant’Egidio, halo inisiativa iha tinan ida-ne’e atu iha fulan Bíblia nian ne’e dedika Loron Domingu ida ba “Maromak nia Liafuan” ho naran “Loron Mundiál Maromak nia Liafuan nian”.

Inisiativa  ida-ne’e hetan ninia validés eh “selu” husi Papa Francisco ne’ebé iha ninia surat apostólika iha konkluzaun Tinan Santu Mizerikórdia nian hakerek: «Konveniente tebes», Papa Bergoglio sujere iha Misericordia et misera, «se komunidade ida-idak, iha domingu ida iha Tinan Litúrjiku, bele hafoun kompromisu ba difuzaun, koñesimentu, no aprofondimentu Sagrada Eskritura nian: domingu ida dedika tomak ba Maromak nia Liafuan, atu komprende rikusoin rohan-laek ne’ebé mai husi diálogu konstante Maromak nian ho nia Povu» (#7).

Superiór Sosiedade S. Paulo, ne’ebé apoia inisiativa ne’e, sita Fundadór Família Paulina, Beatu Giacomo Alberione nia liafuan: «Jezús Kristu husik nia An ba sarani sira ho modu rua: iha Evanjellu no iha Eukaristia. Iha Eukaristia nia mak ai-han no forsa, iha Evanjellu nia mak roman no lia-loos».Tan ne’e importante tebes bá nafatin bee-matan ida-ne’e.

Ita ne’ebé “eduka hodi evanjeliza no evanjeliza hodi eduka” ita keta haluha, hanesan Andre Riccardi (fundadór Comunità di Sant’Egidio) nia liafuan katak iha tempu ida alfabetizasaun jerál labele aseita katak sarani sira sai analfabetu kona-ba Bíblia».

Maski ita ba tinan barak ona mak iha ita-nia programasaun inspetoriál no komunitária tau nafatin aas Maromak nia liafuan, “Loron Mundiál Maromak nia Liafuan nian” eh “Domingu Liafuan nian” tenke fó fali impulsu foun mai ita la’ós de’it iha koñesimentu Bíblia nian maibé mós ksolok atu lee no rekoñese nia nu’udar mata-dalan, “bussóla” iha ita ida-idak nia moris. Hanesan Ezortasaun apostólika pós-sinodál Verbum Domini iha tinan 2010 fó hanoin «Simu Maromak nia Liafuan katak husik Nia forma ita-nia an, atu nune’e, ho Espíritu Santu nia kbiit, ita bele sai hanesan Kristu» (VD 50).