Cailaco –  Laiha ksolok ne’ebé boot liu fali bainhira ita hatene fahe ho ema kiak sira buat oituan ne’ebé ita iha. Iha realidade mundu ohin loron nian kiak sai hanesan kondisaun ida ne’ebé ema kbiit laek sira enfrenta liu-liu hirak ne’ebé iha periferia. Maske ho kondisaun hanesan ne’e sira nunka lamenta no iha sira nia matan nabilan hodi espresa sai ksolok loos nian. Sira hakmatek hodi simu sira nia realidade hodi serbisu maka’as atu sustenta sira nia moris.

Iha loron sábadu 2/12/2017 sai supreza ida ba ami  tan iha loron ida ne’e ami biban atu asiste missa padrueru kapela Tunu Bibi nian no asiste mós família sr. Domingos no sra. Aliza ne’ebé simu kazamentu no iha tempu hanesan nia oan nain lima ho nia aman simu Sakramentu Batizmu dala ida. Família ida ne’e kiak tebe-tebes. Sira hela deit iha toos laran no laiha ema ida interese ba sira. Família ne’e iha  oan nain lima hotu-hotu la eskola tan de’it ekonomia la suporta no mós tanba laiha dokumentu legál ne’ebé eskola sira presiza. Sira nia kazamentu simples liu no nia oan sira mós kontente tan bele simu ona Batizmu. Depois de misa hamutuk ho Pe. Norberto, irman Fransiscana Hospitaleira no labarik OPIAM balun ami hakarak fó supreza ba família ida ne’e hodi ba vizita família ida ne’e, hodi oferese ba sira buat ruma ne’ebé ami prepara ona. Hamutuk ho padre ami lao ba sira nia uma tan sira hela iha toos laran dook husi estrada. Maske dalan difisil tanba taho maibé konsege too iha sira nia hela fatin. Haree tiha sira nia kondisaun ami hotu silénsiu laiha liafuan atu dehan. Tebes kondisaun ne’ebé ami haree mizeravel tebes. Maske nune’e sira haksolok tebes. sira nia ksolok laos tanba ami fó sasan maibé liu-liu tanba ami nia prezensa hodi haksolok hamutuk ho sira iha sira nia loron espesiál. Padre promote ba sira katak loron seluk ami sei ba fali atu vizita sira.

Ho esperiensia sira ne’ebé ami hetan, hafanu fali ami atu sai sensivel ba ema kiak sira nia situasaun, hodi fahe ho sira buat oituan ne’ebé providénsia haraik ba ami. Hein katak ho Kreda nia apelu atu atensaun liutan ba ema kiak sira bele sai oportunidade ba ema hotu atu bele loke matan hodi tulun ema kiak sira.

(Albina do Carmo)