8 Juñu

István Sándor moris iha Szolnok, iha Ungria, 26 Novembru 1914 husi  István Sándor no Mária Fekete. Mia papá servisu iha Ferroviária Estadu nian no nia mamá tau matan uma-laran. Sira fó ba sira-nia oan na’in tolu edukasaun relijioza kle’an. István estuda iha nia sidade no hetan diploma tékniku metalúrjiku. Husi foin-sa’e nia maluk sira hadomi nian, ema ida haksolok, sériu no delikadu. Nia gosta hela ho nia belun sira, ba sira nia mak leader ida, hanesan Giovanni Bosco iha foin-sa’e Chieri sira nia leet. Nia tulun nia alin sira atu estuda no reza hodi fó ezemplu ho ninia hahalok rasik. Loroloron nia serví Santa Misa iha Amlulik Franciscano sira no simu Eukaristia. Nia koñese salezianu sira liuhusi Boletím Salezianu no sente kedas atrasaun ba karizma salezianu.

Maski foufoun nia inan-aman lakohi, nia konsege halo sira husik nia tama iha 1936, iha Clarisseum, iha-ne’ebé nia halo aspirantadu ba tinan rua. Nia tuir kursu iha tipografia ‘Don Bosco’ atu aprende téknika impresaun nian. Nia hahú novisiadu maibé tenke interrompe tanba bolun ba tama ezérsitu. Iha 1939 nia sai husi forsa ho modu definitivu no, tinan tuirmai halo novisiadu no profisaun dahuluk iha 8 Setembru 1940. Nia hetan obediénsia iha Clarisseum, no serbisu badinas iha ensinu kursu profisionál sira. Nia mós iha enkargu asisténsia nian iha oratóriu, ne’ebé nia hala’o ho entuziazmu no kompeténsia. Nia sai promotór Juventude Operária Katólika. Ninia grupu hetan rekoñesimentu nu’udar Movimentu di’ak liu. Tuir Don Bosco nia ezemplu, nia hatudu an nu’udar edukadór modelu.

Iha 1942 nia simu bolun atu bá iha frente funu nian, no simu medulla ba valór militár. Trinxea sira sai fatin oratóriu festivu ne’ebé nia anima ho modu salezianu. Hotu tiha Funu Mundiál II, nia haka’as an ba konstrusaun materiál no morál sosiedade nian, hodi dedika an ho modu partikulár ba foin-sa’e sira ne’ebé kiak liu, ne’ebé nia halibur hodi hanoris sira profisaun eh serbisu ida. Iha loron 24 Jullu 1946 nia halo ninia profisaun perpétua hodi sai Irmaun Salezianu. Iha 1948 nia konsege títulu mestre-impresór.

István Sandor nia alunu sira, bainhira remata estudu hetan kedas serbisu iha tipografia sira kapitál nian no Estadu nian. Iha tempu ne’ebá, hahú ona persegisaun kontra eskola katólika sira, nune’e sira tenke taka odamatan sira. Nia subar iha uma saleziana sira, hodi serbisu ho naran falsu iha tipografia públika ida. Iha Jullu 1952 ema kaer nia iha fatin serbisu no Salezianu sira nunka haree tan ona nia.

Kreda Katólika rekoñese ninia mate nu’udar martíriu iha 27 Marsu 2013. Iha loron 19 Outubru 2013 Kreda foti nia nu’udar beatu iha Budapeste, iha Bazílika S. Estévão liuhusi Kardeál Angelo Amato SDB. Prefeitu ba Kongregasaun ba Kauza Santu sira-nian.

Padre Pascual Chávez Villanueva, nu’udar Reitór-Mor iha tempu ne’ebá hakerek ba Família Saleziana: “István Sándor husi moris mai to’o nia mate mak ema ida profundamente relijiozu, ne’ebé iha sirkunstánsia hotu nia vida nian, hatán ho dignidade no koerénsia ba ezijénsia sira ninia vokasaun saleziana nian… Nia iha kapasidade atu kuda espíritu Fortaleza nian no fidelidade nian ba Maromak no ba maun-alin sira ne’ebé halo nia bele reziste iha momentu prova nian, uluknanai iha situasaan konflitu nian, no hafoin iha prova aas liu saran an nia moris nian… Nu’udar edukadór ezemplár foin-sa’e sira-nian, ho modu partikulár aprendista no foin-sa’e traballadór sira, no nu’udar animadór oratóriu nian no grupu juveníl nian, nia sai ezemplu no estímulu mai ita iha ita-nia empeñu atu haklaken ba foin-sa’e sira Evanjellu ksolok nian liuhusi pedagojia laran-di’ak nian”.