Editoriál: Kreda ida sai husi nia an atu evanjeliza

Amu-Papa Francisco iha Evangelii Gaudium – ninia ezortasaun apostólika dahuluk – hateten katak “Bainhira vida interiór taka an iha interese rasik, nia la sai ona espasu ba ema seluk, ema kiak sira la bele ona tama iha laran, la rona ona Maromak nia lian, la haksolok ona ho Ninia domin, la manas ona ho entuziazmu atu halo di’ak” (EG 2). Ba ne’e mak nia konvida sarani hotu, atu “hafoun ninia enkontru pesoál ho Kristu” (.EG 3; 264 ss).

Maski nune’e, presiza rejeita tentasaun espiritualidade intimista no individualista ne’ebé difisil atu la’o hamutuk ho ezijénsia karidade nian hodi halo momentu orasaun sai deskulpa ida atu evita dedika an ba vida misaun (kf EG 262), atu sai evanjelizadór/a ne’ebé reza no serbisu, ne’ebé la buka glória umana no moris taka an iha ninia estrutura sira: “Ha’u mehi ho opsaun misionária ida ho kbiit atu nakfilak buat hotu, atu kostume sira, estilu sira, oráriu sira, linguajen no estrutura ekleziál tomak sai kanál ne’ebé adekuada liután ba evanjelizasaun mundu atuál nian duké ba ninia auto-prezervasaun” (EG 27).
Mai ita hatán ba Papa Francisco nia apelu urjente ba konversaun misionária, hodi hala’o ita nia misaun edukativa-evanjelizadora ho espíritu Da mihi animas Don Bosco nian hodi buka de’it Maromak nia glória no klamar sira nia salvasaun, ho atensaun partikulár ba família sira iha tinan ne’e, ne’ebé Kreda dedika duni ba sira.