Husi Ir Yashinta Hoar

Venilale – Programasaun Inspetoria nian insiste atu hamoris fali grupu no asosiasaun sira sira iha oratóriu no eskola sira.  Escola Técnico-Profissional (ETP- VENILALE), husi loron 1 Fevereiru 2014 hahú grupu sira hanesan Assosiasaun Don Bosco,  Madre Mazzarello, Mariana no Laura Vicuña.  Liu ona tinan ruma mak grupu hirak ne’e lakon, maibé ho entuziazmu husi irmán idak-idak iha komunidade hakarak atu hamoris fali grupu hirak ne’e, tanba husi Assosiasaun hirak ne’e mak foin-sa’e sira kria amizade entre sira, aprende moris hamutuk iha uniaun objetivu nian no mosu vokasaun Relijioza.

Grupu hirak ne’e maski foin hahú maibé husi membru ida-idak (sira hotu alunu), iha kriatividade ida nu’udar preparasaun ba Kuarezma ne’e, sira sei tau hamutuk osan nu’udar ezmola nune’e bele oferese ba ferik no katuas ne’ebé presiza.  Grupu balun komesa hodi halo postál Valentine no faan ba nia maluk sira no osan hirak ne’e tau hamutuk ba atividade ne’ebé grupu deside tiha ona.

Inisiativa seluk husi programa eskola nian mak estra-kurikulár, hanesan: grupu dansa, koru, toka no desportu. Atividade hirak ne’e hala’o deit iha loron Sábadu.  Ho atividade hirak ne’e ami espera katak foin-sa’e sira ne’e hakbesik liután ba Maromak no bele moris tuir Santu/ Santu sira nia ezemplu ne’ebe sira hili  nu’udar modelu ba sira nia moris.