Husi Ir Albina do Carmo

Baucau – Iha programasaun atividade Infánsia Misionária nian iha mós atividade pasei hamutuk. Nune’e mak ohin domingu 23/2/2014,  labarik grupu Infánsia Misionária hamutuk 65, Animadór/a na’in 5, katekista, Inan-Aman, irmán Albina n irmán Josefa, padre Justiniano nu’udar pároku S. António, halo paseiu hamutuk iha tasi Wata-Bo’o. Iha paseiu ne’e  hala’o mós atividade desportivu no jogu sira ne’ebé envolve labarik hotu- hotu, animadór/a, madre sira, katekista no inan-aman balun ne’ebé disponível atu kolabora ba atividade ne’e.

 

Objetivu husi paseiu ne’e mak uluknanain atu hametin amizade entre labarik sira nune’e sira bele koñese malu liután, halo sira nia amizade sai metin no familiár liután ho animad/a, katekista, madre no Amu Pároku.

Tinan ne’e grupu infánsia misionária  hola parte nu’udar grupu kategorál parokia nian nune’e

iha nia lia-menon amu pároku husu atu labarik sira tenke sai ativu  iha atividade sira Infánsia nian hodi kolabora nafatin iha atividade Parókia nian.

Inan-aman ne’ebé partisipa sente kontente tanba ho atividade hanesan ne’e bele tulun sira nia oan sira sai labarik ne’ebé hatene  hola parte iha atividade sira kreda nian, bele koñese kolega barak, no sai familiár ho animadór/a, madre no padre sira. Iha mós joven ida hosi Distritu Covalima, Simão Noronha ne’ebé hahú atu aprende sai animadór, sente hakfodak hodi haree oinsá labarik sira envolve-an iha atividade hotu ho disiplina no entusziazmu. Nia dehan katak ba nia ida-ne’e buat foun no esperiénsia foun ne’ebé ba dala uluk mak nia hetan. Nia sente katak nia aprende buat barak husi labarik sira no ida-ne’e sai nu’udar ksolok bo’ot ba nia.

Atividade ne’ebé ami hala’o mak hanesan: Reza hamutuk, animasaun, jogu animadu, halo kriatividade hodi uza materiál tasi nian; hotu tiha hariis tasi, han hamutuk, limpeza, avaliasaun ba atividade ne’ebé hala’o, hafoin taka ho orasaun no fila fali.

Ho atividade ne’e halo labarik sira  hotu kontente no  entusiamu atu bá oin ho sira nia kompromisau hodi sai LABARIK APOSTÓLU BA LABARIK  no disponivel nafatin  ba atividade Kreda nian.

 

Komentáriu husi labarik sira:

Ha’u nia naran Bhakita ha’u 3⁰ Ano. Ha’u kontente liu atu tuir grupu Infánsia tanba hau bele koñese diak liután Jezús, koñese mós kolega barak, madre, maun animadór no biin sira. Ha’u mós kontente tanba bele aprende buat barak atu bele sai labarik ne’ebé diak iha hau nia família, iha eskola no mós iha Kreda hau nia papá-mamá kontente liu ho atividade ne’ebé ha’u tuir no sira mós prontu atu kolabora wainhira ami nia grupu halo atividade ruma.

******** VIVA  INFÂNSIA  MISIONÁRIA***********