Comoro Dili – Iha 12 Jullu 2019, membru komunidade Edukativa, Antiga/u no Familia salesiana, hamutuk ho estudante sira Eskola Maria Auxiliadora selebra misa intensaun ba matebian madre Antonia Colombo, FMA ,selebrasaun Eukaristia hala’o iha igreja Maria Auxiliadora Comoro, ne’ebé selebra husi padre Elidio Correia, SDB. Selebrasaun hahu oras 08.30 otl, aluno no Komunidade edukativa sira ne’ebé tuir selebrasaun iha ema na’in 1000, ne’ebé halo igreja naresin no balun tenke hamriik. Padre nia reflesaun hahu hodi foka oituan ba mundo digital liuliu ho HP ne’ebé agora avansa, hodi provoka oituan aluno sira padre halo pergunta ida ne’ebé dehan nune’e: normalmente ema sosa HP ema interese liu ba saida, sira hatan nia kualidade no parte seluk mak memoria balun boot no balun kiik nune’e nia presu diferente, nune’e ho liafuan save memoria padre kompara ho selebrasaun misa matebian ba madre, nune’e dehan ema ne’ebé iha memoria boot mak ema ne’ebé hatene agradese, no ema ne’ebé lahatene agradese mak ida ne’ebé nia memoria kiik liu.

Evanjellu ohin nian koalia kona feto virjen nain 10, fokus laos virjen sira ne’e maibe tama ba atu halo festa, sira ne’ebé beik hela iha liur sira ne’ebé matenek , iha mina ne’ebé pronto sira ne’e mak tama halo festa nupcial,iha reinu lalehan , katak mensajen husi Maromak futar lia konvida atu ita hotu-htu mos prepara-an atu tama iha Maromak nia festa, nune’e madre Antonia Colombo fo ezemplu diak mai ita, madre ho ninia lampada ne’ebé tanba mina sempre iha , laos hanesan sira beik matan dukur, toba hakfodak ba ema liu tiha ona, nia sempre vijilante, prepara-an. Madre Antonia hatudu ona nia sasin ksolok nian ba ita, sorriso ne’ebé mai husi laran no fuan, serbi ho ksolok iha misaun ne’ebé madre hala’o hodi ba vizita foinsa’e no kiak sira iha fatin hotu-hotu, hanesan Don Bosco dehan Ksolok mak dalan ba santidade, nune’e Madre Antonia fo ona ezemplu ida ne’e dalan santidade , nune’e ita agradese Maromak ba madre Antonia nia sasin ksolok nian. Hafoin missa remata estudante sira kontinua fali aula normal.

(Maria Sarmento Guterres)