Baucau – Moris nu’udar konsagrada no saleziana iha dimensaun ida ne’ebé mak tulun ita atu hafoun, hametin, habiit no haburas ita-nia moris komunidade no misaun mak prezensa madre provinsiál nian iha komunidade ne’ebé hakerek ona iha ita konstituisaun art. 104, ne’ebé dehan: Vizita Kanonika. Maske tuir konstituisaun formalmente superiora tenke hala’o maibé ksolok boot liu ba ami mak madre Alma nia prezensa inan no bin nian iha ami-nia leet.Iha loron tolu-nia laran, fahe moris ho no hamutuk ho ami iha komunidade Santa Teresa D’Avilla Baucau, nia tulun no orienta ami irmã ida-ida no nu’udar komunidade oinsá atu deskobre santidade iha moris loroloron nu’udar pesoál no nu’udar komunidade. Iha madre provinsiál ninia konferensira sira, buat seluk ne’ebé nia subliña mak haburas relasaun katak nu’udar komunidade halo dalan santidade nian hamutuk tan husi ne’e mak ita deskobre santidade ema ida-ida nian, tanba atu sai santa iha moris baibain mós, no kmanek ka beleza ema ida-ida nian mak santidade no santidade mak karidade loos nian.

Atu to’o iha santidade madre Alma dehan teni: FMA ida-idak tenke aprende husi Maria Virjen, tuir ezemplu Maria Virjen nian liuliu iha festa kazamentu nian iha rai Kana Galeleia, katak nu’udar FMA presiza uluk knana’in sai komuñaun ho Maromak, sai feto ne’ebé haksolok, haki’ak moris no fó moris, iha atitude inan nian, hahalok edukativa, justisa no liverdade. No kona-ba misaun, madre provinsiál fó hanoin ba komunidade atu kria ambiente ne’ebé favorese joven sira, atu sira sente uma no sente katak ita proteje sira.

Iha vizita ne’e madre mós ba hasoru ADMA no Antigas alunas sira iha komunidade SDB iha Baucau iha loron 13 fulan Jullu 2019. No iha dia 14 Jullu lokraik oras tuku 3.00 PM Santa Misa agradesimentu nian selebra husi Pe. Agnelo Jeronimo Moreira, diretór komunidade SDB Baucau nian. Iha santa misa ne’e partesipa husi grupu oinoin, hanesan: ADMA, AJA, Antigas alunas FMA nian, animador/a oratoriu nian, grupu Laura Vicuña señor no junior, oratorianu sira husi sentru rua: Dewake no Maria Ausiliadora Teulale, komunidade Edukativa. Hotu tiha santa Misa husi sira agradese madre Provinsial liuhusi dansa no kanta ne’ebé sira hoto’o ba nia.

No tiha programa ne’e madre Provinsial hato’o liafuan ba partesipante sira, liuliu ba joven sira sira nia fó korajen atu dezenvolve sira-nia talentu sira ne’ebé mak sira iha. Hotu tiha ne’e komunidade oferese ba hothotu merenda hafoin ida-ida fila ba sira-nia uma ho ksolok. No ohin loron 15 fulan Jullu 2019, madre provinsial sai husi komunidade Baucau no ba fali Venilale.

(Lucia Pereira)