Papa Francisco iha Angelus 21 Jullu 2019

Maun no biin-alin sira, bondia!

 

Iha pasajen domingu ne’e nian, evanjelista Lucas haktuir Jezús nia vizita iha Marta no Maria nia uma, Lázaro nia feton sira (kf Lc 10,38-42). Sira simu nia, no Maria tur iha Ninia ain sira atu rona Nia; nia husik buat ne’ebé nia halo hela atu hela besik ba Jezús: nia lakohi lakon Jezús nia liafuan sira ida. Buat hotu nia tau ba sori tanba, bainhira Nia mai vizita ita-nia moris, Ninia prezensa no Ninia liafuan mai uluk buat hotu. Na’i nafatin surprende ita: bainhira ita tau an atu rona duni Nia, kalohan sira lakon, dúvida sira fó fatin b alia-loos, ta’uk sir aba hakmatek, no situasaun oioin moris nian hetan nia kolokasaun loloos: Na’i sempre, bainhira Nia mai, sistema sasán sira, ita mós

Iha sena ida-ne’e Maria Betánia nian iha Jezús nia ain, S. Lucas hatudu atitude fiar-na’in orante, ne’ebé hatene horik iha Mestre nia prezensa atu rona Nia no tau an iha sintonia ho Nia. Katak halo parajen ida Durante loron, atu hamnook iha silénsiu, ba minutu ruma, atu fó espasu ba Na’i ne’ebé “liu” no hetan korajen atu hela uitoan “haketak an” ho Nia, hodi fila hikas, ho hakmatek no efikásia, ba sasán sira loroloron nian. Hodi hahí Maria nia komportamentu, ne’ebé «hili buat nee’bé di’ak liu» (v. 42), Jezús hanesan hakarak repete mai ita ita ida-idak: “Keta husik sasán sira ne’ebé imi tenke halo preokupa imi, maibé uluknanai rona Na’i nia lian, atu hala’o didi’ak knaar sira ne’ebé moris entrega ba ó”.

Hafoin ita iha biin, Marta. S. Lucas dehan katak nia simu Jezús (kf v. 38). Karik Marta mak biin boot, ita la hatene, maibé feto ne’e, loos duni, iha karizma ospitalidade nian. Defaktu, enkuantu Maria tur atu rona Jezús, nia okupada ho serbisu barak. Tanba ne’e Jezús dehan ba nia: «Marta, Marta, ó fadigadu no preokupa ho buat barak» (v. 41). Ho liafuan sira-ne’e Nia la iha intensaun atu kondena atitude servisu nian maibé, fadigadu ne’ebé nia iha hodi halo. Ita mós partilla Santa Marta nia preokupasaun no, tuir nia ezemplu, ita hakarak atu iha ita-nia família sira no ita-nia komunidade sira, moris sentidu akollimentu/simun nian, fraternidade nian, atu nune’e ema bele sente hea “iha uma”, liuliu ki’ik-oan sira no ema kiak sira bainhira dere odamatan.

Nune’e, Evanjellu ohin nian fó hanoin mai ita sabedouria fuan nian ne’ebé hatudu iha hatene konjuga elementu rua ne’e: kontemplasaun no asaun. Marta no Maria hatudu dalan mai ita. Se ita hakarak koko moris ho ksolok, ita tenke tau hamutuk atitude rua ne’e: husi parte ida, “horik iha Jezús nia ani”, atu rona Nia enkuantu Nia fó sai mai ita buat hotu nia segredu; husi sorin seluk, lais no pronto ba ospitalidade, bainhira Nia liu no dere ita-nia odamatan, ho oin belun ne’ebé iha nesesidade ba momentu ida atu reforsa nia an no nesesidade fraternidade nian. Presiza ospitalidade.

Maria Santíssima, Kreda nia Inan, haraik mai ita grasa atu hadomi no serví Maromak no maun-alin sira ho Marta nia liamn no Maria nia fuan, basá hodi rona nafatin Kristu ita bele sai hari’i-nain dame no esperansa nian. No ida-ne’e interesante liu: ho atitude rua ne’e ita sei sai hari’i-nain dame no esperansa nian.