Carta Pastoral Quaresma 2014

“Imi buka salva institutição ida ne’e”

Reverendos Párocos

Reverendos Padres

Comunidades Religiosas

Sarani Dioseze Baucau

 

Ita hotu hatene katak tinan ida ne’e,Uma Kreda dedica ninia atenção tomak ba família, tan haré no sente katak instituição ne’e lao nakdoko teb-tebes, no Amo Papa Francisco sente hanesan ita ema, liliu Organização mundial balu, hakarak halakon instituição ida ne’e, ou pelo menos hamihis nia significado no nia folin iha sociedade nia moris.

Ha’u hakarak tebes kaer no convida ita hot atu hanoin deit kona ba Amo Papa nia liafuan ida nebe’e nia hateten semana balu liu ba, wainhira nia fo lia menon ba cardeal sira nebe’e nia hili atu tulun ukun Kreda. Koalia kona ba família Amo Papa dehan “imi buka salva instituição ida ne’e”.

“Buka salva” – Wainhira ita dehan katak salva buat ida, ka ema ida, ka situação ida, ne’e katak realidade ida ne’e tama iha susar laran, moris iha perigo nebe’e bo’ot tebes. No mos se “buka salva” ne’e tanba ema ne’e, ou situação ida ne’e folin bo’ot no importante teb-tebes. Katak se buat ida ne’e lakon, consequência sei todan.

“Instituição” – katak hamosu organização nebe’e importante ba sociedade nia moris. Instituir katak hamosu ou halo moris organização ida nebe’e bele halo serviço ida ba ema hotu nia moris, no ema hotu reconhece buat moris ida ne’e nia valor, nia significado no ninia improtância. Pessoalmente, ha’u hatutan tan Amu Papa nia preocupação ida ne’e ho pergunta oan ida: “Salva instituição ka salva ema?”

Ha’u husu no recomenda atu comunidade sarani iha ita nia diocese laran hanoin kona ba Amo Papa nia preocupação id ane’e hodi reflecte ho perspectiva nebe’e ha’u sugere: “salva instituição ka salva ema?” buat rua ne’e iha ligação ba malu? Se iha ligação duni, ligação maka ida nebe’e?

Vigararia Epicospal ba Pastoral organiza catequese ba tempo quaresma ho publicação brochura ida ho tema central maka família. Oinsa iha tempo quaresma ida ne’e família ida-idak bele haré ba nia-án ho lalenok Evangelho nian.

Cristo nia escolante sira iha obrigação atu “sai masin no naroman” iha tempo hot-hotu no iha situação hot-hotu, tuir Cristo nia ordem.

Tempo atu ita, Cristo nia escolante sira, liliu católico sira, hanoin oin sa’a ita bele “sai masin no naroman: ba tempo ohin, liu housi família sira nia moris.

Santa Quaresma ba maun alin sira hotu.

 

Baucau, 5 de Março de 2014

 

D. Basílio do Nascimento

Bispo de Baucau