Papa Francisco nia katekeze – 26 Marsu 2014

Iha katekeze kuarta 26 Marsu nina, Papa Francisco reflete kona-ba sakramentu Ordem. Nia destaka karakterístika tolu ministériu amlulik sira-nian, bispu no diákonu sira: serví ho domin, sai apaixonadu ba Igreja no habiit ministériu ho orasaun, Maromak nia Liafuan no sakramentu Eukaristia no Peniténsia nian.

Asesu Katekeze ho lia-portugés

Francisco esplika katak Ordem mak sakramentu ne’ebé abilita ho ezersísiu ministériu nian, ne’ebé Jezús mak entrega atu bali ninia luhan, no hala’o knaar ne’e la’ós ho ema-nia kbiit, maibé ho Espíritu nia kbiit. “Padre, bispu, diákonu tenke bali Na’i nia luhan ho domin. Se sira la halo ho domin, la serve”.

Sira ne’ebé simu ordem it akonsidera nu’udar líder komunidade nia, Papa Francisco dehan. Maibé, nia resalta katak, ba Jezús, ida-ne’e signifika tau autoridade rasik atu serví, hanesan Nia hatudu no hanorin ba Ninia dixípulu sira.

“Bispu ida ne’ebé la tau nia an ba servisu komunidade nian nia la halo di’ak. Amlulik ida, padre ida, ne’ebé la tau nia an ba servisu komunidade nian la halo di’ak. Nia sala”.

Aleinde tau an ba servisu, sira ne’ebé simu sakramentu Ordem presiza iha domin apaixonadu ba Igreja, hanesan Papa esplika. Hodi kbiit Ordem nian, ministru tenke dedika an tomak ba komunidade rasik no hadomi ho fuan tomak, hanesan Kristu hadomi Igreja.

Aspetu ikus Papa Francisco destaka kona-ba Ordem mak nesesidade atu habiit ministériu ne’ebé mai husi sakramentu ne’e. Sei hala’o ida-ne’e liuhusi orasaun, rona Maromak nia Liafuan, selebra loroloron Eukaristia no mós ho Sakramentu Peniténsia.

Tuir Amu-Papa, bainhira buat ne’e akontese, bispu eh padre sei lakon sentidu auténtiku ba ninia servisu rasik no mós lakon ksolok ne’ebé mai husi komuñaun ho Jezús.  “[…] iha prazu naruk, sir alakon uniaun ho Jezús no sai mediokridade ida ne’ebé la halo di’ak ba Igreja”, Papa hateten, nune’e mós husu atu harohan ba bispu no padre sira nia ministériu.

Nia konklui ninia reflesaun sira hodi haktuir sá mak tenke halo atu sai padre hodi destaka katak sai padre mak inisiativa ida husi Maromak nia parte.

“Vontade atu sai amlulik, atu serví ema seluk iha sasán sira mai husi Maromak. Vontade atu fó moris tomak ba sersivu atu katekiza, batiza, perdua, selebra Eukaristia, tau matan ba moras sira… maibé, moris tomak nune’e! Se imi ruma sente buat ne’e iha imi-nia fuan, Jezús mak tau buat ne’e iha laran! Imi tau matan ba konvite ne’e no harohan atu nia sai buras no fó fuan ba Kreda tomak”