Dili – Ministerio Edukasaun Nasional hili S. Joaun Paulo II nu’udar mahein ba edukasaun iha Timor. Ho motivu ida ne’e sira organiza atu Ilas bele vizita Eskola sira molok selebra tinan 30 Amu-Papa Joaun Paulo II nia visita iha Tasi tolu.

Ba okaziaun ida ne’e mak ohin illas S. Joaun Paulo II, visita iha Eskola Maria Auxiliadora Comoro hahu husi loron 1-8 Setembru 2019. Eskola Maria Auxiliadora simu husi Eskola Saun Pedro Comoro iha Parokia Maria Auxiliadora nia oin. Nune’e estudante husi Eskola Maria Auxiliadora sira  simu illas hafoin kontinua kedas ho Santa Misa iha Parokia molok mai iha Eskola. Serimonia entrega nian husi eskola saun Pedro akompaῆa ho sira nia banda musica no dansa kultura hodi despende, hafoin diretor Eskola Saun Pedro, Pe. Aderito Victor SDB hato’o lia fuan agradesimento nu’udar lia menon ba estudante sira. Nia dehan: Ohin husi Eskola SDB entrega Ilas ba Eskola FMA nune’e padre hateten tan katak S. Joaun Paulo II mak santo ida ne’ebé hadomi foin-sa’e sira no mos hadomi Kongregasaun Salesiana, tamba tau matan ba foin-sa’e sira hanesan nia lia-menon iha DB nia Kanonizasaun hodi foti nia nu’udar aman, mestre no belun ba foin-sa’e sira. Tamba ne’e padre husu ba atu simu Ilas ne’e maibe liu-liu tau matan ba joven sira atu bele sai sarani ne’ebé di’ak no sidadaun onesto hodi tulun sira atu hadomi Jesus hanesan S. Domingos Savio no Beata Laura Vicuῆa, tamba ida ne’e mak SDB no FMA sira nia misaun. Hafoin de diskurso husi diretor da Eskola Saun Pedro, Eskola Maria Auxiliadora simu mos ho diskurso badak husi madre diretora da Eskola Madre Paolina Correia FMA. Iha ninia lia fuan benvinda nian, nia repete fila fali mensajen Papa Joaun Paulo II ninia hodi konvida atu “loke odamatan fuan nian ba Kristu” liu liu iha fulan setembru ne’ebé dedika ba fulan Biblia nian. Husik atu Maromak Futar lia bele hetan fatin iha ita nia fuan, nune’e ita bele sai masin no naroman ba mundo.

Lia Fuan hanesan hato’o mos iha omilia  husi Padre Apolinario Neto SDB, ne’ebé dehan katak Ihas nia visita mak grasa ida ba ita. Oinsa ita ida  hamamuk ita nia an atu husik Nai Maromak hatudu ninia domin salvasaun ba ita. Ita hotu brani atu sai Jesus nia belun, ita prontu atu rona Maromak nia lia fuan no moris tuir virtude ne’ebé di’ak iha moris lor loron nian, ne’e mak vida santidade nian. Imi keta tauk atu fo fatin ba Jesus, loke imi fuan atu Jesus bele hela ho imi, hanesan Amo Papa Joaun Paulo II konvida atu la tauk loke ita nia fuan, ita nia moris ba Jesus.

Depois de misa, estudante sira ho devosaun bo’ot no ho ksolok akompana Ilas ba eskola Maria Ausiliadora hodi ba to’o iha GYM Eskola nian, iha ne’ebá sira taka serimonia ho orasaun hamutuk. Illas sei horik iha eskola durante semana ida nia laran, nune’e sei iha aktividade espiritual no formasaun ba turma ida idak ho sira nia profesores tuir programa ne’ebé komisaun programa ona.

(Miranda da Cruz)