RV – Papa Francisco simu iha Segunda, 31 Marsu membru sira Kapítulu Jerál da-27 Salezianu sira-nian. Tema kapítulu nian mak “Sasin radikalidade evanjélika”.

Papa Francisco husu Salezianu sira atu “tau nafatin iha oin Don Bosco no joven sira; no Don Bosco ho ninia lema: ‘Da mihi animas, cetera tolle’. Nia reforsa ninia programa ne’e ho elementu rua seluk: serbisu no temperansa”.

Santu Padre hatutan : “Ha’u hanoin katak iha koléjiu bandu halo siesta [toba loraik]… Temperansa …! Ba salezianu sira no ba ita! «Serbisu no temperansa – nia hateten – halo  Kongregasaun buras». Bainhira ita hanoin atu serbisu ba klamar sira nia di’ak, sei supera tentasaun mundanizmu espirituál, la buka buat seluk, maibé Maromak de’it no Ninia Reinu. Temperansa mak fó sentidu sasukat nian, halo kontente, sai simples! Don Bosco no mamá Margherita nia pobreza inspira salezianu ida-idak no imi-nia komunidade ida-idak ba vida esensiál no austera, babesik ba kiak sira, transparénsia no responsabilidade iha jestaun soin sira-nian”.

Tuir Papa, Espíritu Santu sei asiste Insitutu relijiozu atu komprende espetativa sira no dezafiu sira ita-nia tempu nian, liuliu ida foin-sa’e sira-nian ne’ebé sira nia formasaun sai baze ba kongregasaun nia apostoladu prinsipál.

Ba Salezianu sira Amu-Papa dehan katak, evanjelizasaun foin-sa’e sira-nian iha ligasaun metin ho edukasaun, no nia enkoraja sira iha sira-nia haka’as an atu hatán ba krize edukasaun emerjente, enkuantu hanoin nafatin katak “Sistema Preventivu” D. Bosco nian, bazeia ba laran-di’ak no amizade ho alunu sira.

Nia mós ko’alia kona-ba ezkluzaun foin-sa’e barak enfrenta. “Imi hanoin ba realidade boot dezokupasaun nian, ho ninia konsekuénsia negativu sira,” Papa hateten. “Imi hanoin ba dependente droga sira-nian, ne’ebé triste tebes barak loos, maibé mai husi abut komún ida katak falta domin loos. La’o bá to’o ba foin-sa’e sira iha ninin husu barani, maturidade no orasaun barak.”
Nia urje salezianu sira atu uza “dixermenntu ho atensaun boot” bainhira haruka ema ba periferia sira iha-ne’ebé joven sira sira ne’ebé ezkluidu horik bá.

Santu Padre mós enkoraja moris komunidade salezianu sira-nian, ne’ebé nia hateten suporta apostoladu tomak.
“Kbiit umanizadora Evanjellu nian hatudu liuhusi fraternidade moris iha komunidade, inklui akollimentu, respeitu, tulun malu, komprensaun, laran-di’ak, perdaun no ksolok”, Amu-Papa salienta. “Espíritu família nian ne’ebé Don Bosco husik ba imi mak tulun boot kona-ba buat ne’e, hodi enkoraja perseveransa no lori atrasaun ba moris konsagrada”.

Molok despede, Papa Francisco halo votus atu Bisentenáriu Don Bosco nia moris nian sai momentu propísiu ida atu propoin filafali Fundadór nia karizma.