Cassa (Ainaro-TL) – Komunidade s. João Bosco Balide simu obediénsia husi Madre provinsiál, Me. Alma Castagna atu hala’o missaun iha Ainaro Cassa. Iha loron 16-20 Dezembru 2019; Madre Diretora Me. Evangelina , Ir. Ana Rosalia Pereira no Ir. Benedita Dos Santos ba Ainaro Cassa ho objetivu atu prepara sarani sira ba festa Natal nian. Iha suco Cassa kompostu husi Aldeia 5 no populasaun 750 xefe família/KK, ami konsege ba vizita família sira iha fatin sira ne’e hotu maski la iha transporte. Maibé buat ne’ebé halo ami laran manas liután mak wainhira sarani sira kontente ho ami-nia prezensa iha sira leet maski ami na’in tolu hotu ema foun.

Esperiénsia dahuluk ba ami-nia komunidade nune’e tulun ami atu haluan liután ami nia hateken ba Periferia ne’ebé Amu Papa Fransisco apelo ba ita hotu atu loke ita nia odamatan ba hasoru kiak no kiik sira ne’ebé abandona. Fiar katak iha ami nia enkontru ho labarik foin-sa’e no família bele fó fuan barak no wain liután iha ita nia misaun ne’ebé sei tuir mai. Sarani sira haksolok hodi hare Madre Saleziana sira nia prezensa, no iha foin-sa’e Albertina alias Atina ne’ebé pronta akompaña ami bá fatin hotu ne’ebé ami bele bá maske la’o dook loron manas, hamro’ok no kolen maibé laran manas no entuziasmu nafatin ba vizita sarani sira ne’ebé hein Maromak nia Liafuan bele to’o ba sira, liuliu iha preparasaun ba festa boot NATAl nian.

Iha dadeer ami dedika an ba vizita família sira husi uma ba uma hafoin iha loraik ami hala’o oratorio no fó formasaun ba sarani sira ne’ebé hela besik iha Igreja. Pároku Armindo Brito, sente kontente no admira ho Madre sira nia prezesna bele halibur sarani barak ba preparasaun Natal nian Amu-pároku mós hakfodak tamba Misa loron baibain nian iha tersa dia 17 no kinta dia 19 sarani barak mak partisipa, ne’e pela primeira vez ne’ebé Igreja nakonu kompara ho loron domingu nian. Depois de Misa Amu-pároku han hamutuk ho Irmán nain 3 hafoin fahe espíritu família no fraternidade hafoin fila fali ba Ainaro. Agradese ba Maromak no ba Madre Provinsiál no mós nia konselleira sira ne’ebé fó oportunidade ida ne’e maske ami iha uma laran atividade barak maibé ami mós la taka matan ba Inspetoria nia presiza; ida ne’e halo ami hanoin no reflete Nain Feto nia Liafuan ne’ebé dehan ba Madre Mazzarello “Hau entrega sira ba ó”. Loos duni entrega ida ne’e halo ami laran-manas liután atu haklaken Maromak nia Liafuan no habelar Karizma salezianu iha Cassa, fatin ne’ebé simples no dook hamutuk ho ema simples no kiak sira.

Ita kontinua reza ba sarani sira CASSA nian atu sira nia fiar metin nafatin ba Maromak no hakbesik an ba Sakramentu sira liuliu sakramentu Rekonsiliasaun no Eukaristia. Ami promete ba sarani sira katak tinan 2020 kada fulan ami sei mai fali hala’o missaun iha Cassa nune’e sarani sira apresia atu ami bá regularmente.

 

Husi Ir. Benedita dos Santos no Ana Rosalia Pereira