Baucau – Ohin loron 26 fulan Janeiru, hatene katak fulan Janeiru mak fulan santu salezianu sira-nian hanesan Festa Beata Laura Vicuña no San Francisco de Sales, nune’e mós ohin domingu, semana datolu tempu bainbain nian nian ne’ebé amo Papa Francisco hahú loron ohin,dedika tinan ne’e nu’udar tinan Biblia nian katak sarani hothotu iha dereitu no dever atu estuda Biblia ne’ebé nu’udar dalan, roman no we matan vida sarani nian, no ema ne’ebé lahatene Biblia, nia lahatene Jezús Kristu.
Ho motivu rua iha leten ne’e mak Ir. Lucia hamutuk ho animadores sira oratoriu Maria Ausiliadora Teulale nian, organiza jogos no atividade oinoin ne’ebé iha objetivu rua hodi selebra festa santu nain rua nian liuliu kona-ba espirituál, senbiliza labarik no foin-sa’atu koñese no kompreende Biblia ami halo orasaun hahú ho prosisaun ho Maromak-Nia Futar lian (Biblia). Prosesu prosisaun nian hala’o hanesan ne’e :
Hahú ho hananu, deposi lee salmu 119, leitor lee neineik no hirak ne’ebé halo prosisaun la’o hakmatek to’o iha fatin ne’ebé prepara ona. Depois salmu no leitura sira, Ir. Lucia esplika kona-ba importansia Biblia nian, katak ita laharee Maromak Aman no Jezús maibé liuhusi Nia futar liafuan ita bele rona sira-nia lian no koñese liuhusi obras no milagre sira ne’ebé haktuir iha Sagrada Eskirtura. No ohin loron, se ita hakarak atu hasoru Jezús iha moris ita presiza lee Nia futar liafuan. Ikus husu oratorianu sira sira se sira iha liafuan di’ak, sira hotu dehan sira iha. Nune’e fó TPC ba atu lee Biblia ho sira-nia aman inan. Hotu tiha orasaun no formasaun ne’e tuir tradisaun fó merenda kiik oan, ba sira ida-ida hodi selebra festa Santo Francisco no Beata Laura vicuña nian. Hafoin ida-ida fila ba uma ho ksolok.

(Lucia Pereira FMA)