Papa Francisco iha Angelus – 26 Janeiru 2020

Maun no biin alin sira, bondia!

Evanjellu ohin nian (kf Mt 4,12-23) aprezenta mai ita inísiu misaun públika Jezús nian. Ida-ne’e akontese iha Galileia, rai ida periferia nian konfronta ho Jerusalém, no ema hateke ho suspeitu tanba nia mistura ho jentiu sira. Husi rejiaun ida ne’ebá ema la hein buat di’ak no foun ida; maibé, iha ne’ebá duni mak Jezús, ne’ebé sai boot iha Nazaré Galieleia nian, hahú ninia pregasaun

Nia haklaken núkleu sentrál ninia hanorin nian ho apelu: «Nakfilak an bá, tanba reinu lalehan nian besik ona» (v. 17). Anúnsiu ida-ne’e hanesan ahi-lakan nia nabilan ida iha nakukun no fera abu-abu, no fó hanoin Isaías nia profesia ne’ebé ita lee iha kalan Natál nian: «Povu ne’ebé la’o iha nakukun haree naroman boot ida; ba sira ne’ebé la’o iha rai nakukun nian naroman ida mosu ba sira» (9,1). Ho Jezús nia vinda, roman mundu nian, Aman Maromak hatudu ba umanidade ninia prosimidade no amizade.  Nia haraik ida-ne’e mai ita gratuitamente hodi hakat liu ita-nia méritu sira. Prosimidade Maromak nian no amizade Maromak nian la’ós ita-nia meresimentu ida: ne’e mak don gratuitu Maormak nian. Ita labele rai don ida-ne’e

Apelu ba konversaun, ne’ebé Jezús dirije ba ema hotu ho hakaran di’ak, bele komprende tomak iha eventu manifestasaun Maromak nia Oan nia roman, ne’ebé ita medita iha domingu sira liubá. Dalabarak rezulta imposivel troka moris, husik dalan egoízmu nian, aat nian, abandona dalan salan nian tanba ita foka  empeñu konversaun nian iha an rasik de’it no hodi kbiit rasik, no la’ós hodi Kristu no Espíritu. Maibé ita-nia adezaun ba Na’i labele redús ba esforsu pesoál, lae. Fiar ida-ne’e mós salan ida foti-an nian.  Iita-nia adezaun ba Na’i labele redús ba esforsu pesoál, maibé tenke esprime iha abertura konfiansa fuan no neon nian atu simu Jezús nia Liafoun Di’ak. Ne’e – Jezús nia Liafuan, Jezús nia Liafoun Di’ak, Evanjellu – mak muda mundu no fuan sira. Nune’e, ita simu bolun, atu konfia iha Kristu nia liafuan, atu loke an ba Aman nia mizerikórdia no husik Espíritu Santu nia grasa transforma ita.

Husi ne’e mak hahú perkursu loloos konversaun nian. Hanesan akontese ba dixípulu dahuluk sira: enkontru ho Mestre divinu, ho ninia hateken, ho ninia liafuan fó ba sira impulsu atu tuir nia, atu muda moris hodi tau an ho modu konkretu iha servisu Maromak nia Reinu nian.

Enkontru surprendente no desizivu ho Jezús fó inísiu ba dixípulu sira nia dalan, hodi nakfilak sira iha hakaken-na’in no testemuñu Maromak nia domin nian ba ninia pou. Hodi banati tuir hakaken-na’in dahuluk sira no mensajeiru sira Maromak nia Liafuan nian, ita ida-idak nele halo ain-hakat iha Makso’in nia ain-fatin, atu oferese esperansa ba ema sira ne’ebé hamrook ba ne’e

Atu Virjen Maria, ne’ebé ita dirije iha orasaun Angelus nian ida-ne’e, sustenta ita-nia propózitu sira ne’e no apoia ho ninia intersesaun inan nian.