Dili – Ohin, 4 Agostu, ita selebra memória S. João Maria Vianney nian, Nailulik pároku sira nia padroeiru. Agradese Maromak ba Ninia domin no grasa hotu ne’ebé haraik ba ema ida-idak basá  depoizde halo ezersísiu espirituál ne’ebé prega husi pe. Rolando Fernandez, SDB, ohin durante selebrasaun  Eukaristia irmán juniores sira ho fiar no aten-brani hatán “sim” ba Na’i nia konvite domin nian hodi hafoun fali aliansa domin nian ho Maromak iha Institutu Filhas de Maria Auxiliadora. Aliansa ne’e liu husi votus ne’ebé ami profesa iha ami nia primeira profisaun. Iha tempu hanesan, iha Sumba (Indonesia), Ir juniora na’in rua, Ir Libanha no Ir Fátima ne’ebé rezidente iha Palla mós renova sira-nia votus iha Ir Veronika nia liman nu’udar delegada provinsiál nian, depoizde retiru online hamutuk ho grupu iha Dili, Timor-Leste,.

Iha omilia padre Rolando hateten: “Maromak hadomi imi no hili imi ho domin privilejiadu, imi mos hetan aten brani hodi hatán ba Maromak nia konvite maske ohin loron ema balun susar ona atu tuir dalan ne’e, maibé hanesan Saun Paulo dehan: imi hetan buat ona buat ne’ebé folin liu iha moris mak KRISTU, nune’e imi husik buat hotu. Imi buka ba atu moris didiak momentu prezente hodi husik buat hotu ne’ebé sei akontese iha futuru ba Maromak nia liman no tau mos imi nia fidelidade iha Maromak nia liman”.

Depoizde misa irmán sira hotu ne’ebé halo retiru dahuluk agradese ba padre Rolando ne’ebé fó nia tempu hodi prega retiru mai ami; ba madre Alma ne’ebé akompaña irmán ida-idak ho domin no mos ba madre Isaura ho nia ekipa ne’ebé prepara hahan mai ami. Agradese Nai ba diak hotu ne’ebé haraik ona mai ami.

Obrigada barak!

(Cesarina Correia FMA)