“Ha’u klamar hahí Na’i ” (Lc 1,46)

Dili – Ohin FMA iha Timor no Indonesia hamutuk ho Nain Feto Virjen Maria, hananu knananuk Magnificat hodi hasae hahí no agradese ba  Aman Maromak domin no laran sadia nain ba grasa no bensaun wain ne’ebé haraik ona mai Inspetoria Timor-Indonesia (TIN) liu husi Me. Alma Castagna, FMA nia prezensa nu’udar Inspetora iha Inspetoria ida ne’e. tan ne’e iha Komunidade Novisiado-São José Komoro-Dili nakonu ho domin gratidaun nian oferese orasaun ba intensaun sira ne’e liu husi Lectio Divina ne’ebé  halo iha loraik molok loron festa nian, orasaun Laudes ne’ebé nakonu ho intensau no laran manas, Misa Solene ne’ebé prezide husi Pe. Matias Pinto, SDB, orasaun Tersu animadu no Orasaun Vésperas gratidaun nian.

Motivu Agradese ba Maromak ba Me. Alma nia prezensa iha Inspetoria TIN tamba nu’udar Inspetora Madre sai sinal uniaun nian no tali komuñaun nian entre FMA hotu iha fatin ida ne’e. Agradese ba Me. Nia domin Ne’ebé hanesan Inan no Bin hodi  akompaña no tulun irman ida-idak deskobre Maromak Nia hakarak no lao iha dalan Santidade nian. Agradese ba Madre nia dedikasaun tomak hodi halao knar ho domin no pasiénsia, responsabilidade, sakrifisiu, sasin moris saleziana autentika hodi suporta no enkoraja nafatin irman ida-idak atu fiel iha vokasaun relijioza salesiana. Ne’e mak okaziaun furak atu husu Maromak atu haraik ba Me. Alma Grasa hotu ne’ebé Madre presiza, saude di’ak, protesaun no bensaun ba Madre nia família no knar hotu ne’ebé Madre halo.

Iha selebrasaun Eukaristia, Pe. Matias nia omilia, Nia dehan: “Iha eukaristia dader ida ne’e mak momentu furak atu ita hare ba eventu no pesoa rua. Sira mak Nain Feto Virjen Maria no Me. Alma ne’ebé tamba Kristu sira fo sira nia moris hodi servi ema seluk. Kristu mak sira nia Sentru tan ne’e Nain Feto lao do’ok ba Sta. Isabel nia uma atu fo tulun, Me. Alma lao do’ok husi Italia to’o Timor atu haklaken Kristu liu husi Karisma Saleziana. Sira hatudu hahalok di’ak laos sira nia-an. Tamba di’ak ne’e mai husi Maromak. Ida ne’e la signifika katak Madre la iha frakeza. Tamba ne’e Padre konta istoria badak ida atu taka nia omilia. Nia dehan: ‘loron ida belun nain rua; Rosa ho Maria, ba pasiar iha tasi ibun. Sira prepara merenda atu han tuir dalan.  Tamba Rosa sofre moras stomag entaun iha dalan nia han hotu tiha merenda. Maria hare, nia sateadu no basa Rosa dala ida iha nia hasan. Rosa oin mean kedas no to’o iha tasi ibun nia hakerek iha raihenek leten ho letra bo’ot “ohin Maria basa ha’u”. Depois sira rua deside atu haris tasi. Wainhira sira tama iha tasi laran, hare katak Rosa la hatene nani no nia kuaze mout. Maria nani lalais ba salva tiha nia. Lori nia mai tasi ibun hodi hasai tasi ben ne’ebé Rosa tolan. Hotu tiha Rosa sente di’ak no nia hakerek iha fatuk bo’ot ida ne’ebé besik tasi ibun “ ohin sorte Maria salva ha’u”. Maria hare ida ne’e no nia hakfodak. Maria husu ba Rosa: ‘Rosa, ó komik ohin ha’u basa ó, ó hakerek bobot iha raihenek leten, agora ha’u salva o, hakerek ó hakerek iha fatuk leten?’ Rosa hatan: ‘belun ohin ha’u hakerek ó nia hahalok a’at basa ha’u ne’e iha raihenek leten atu laloran mai lori lakon tiha, nune’e ha’u haluha tiha. Maibé wainhira ó salva ha’u, ha’u hakerek iha fatuk atu laloran lalika halo lakon atu ha’u la haluha. Tanba se ha’u hanoin nafatin a’at ne’ebé ó halo mai ha’u, halo ha’u laran moras no konserteza motiva ha’u sai a’at liután, maibé ha’u ha’u hanoin nafatin ó nia di’ak ida ne’e motiva ha’u atu sai di’ak liután.’ Nune’e mós ohin ita hanoin Nain Feto no Me. Alma nia di’ak hotu atu motiva ita sai di’ak liután iha moris.”

Obrigada barak Me. Alma ba ita nia di’ak hotu ne’ebé halo ona mai ami iha tinan hirak ne’e nia laran, Maromak sei rekompensa Madre nia di’ak hotu ne’e ho grasa no bensaun wain.

Obrigada, Grazie, Thank you Me. Alma.

(Noemia de Deus FMA)