“HAU KLAMAR HAHÌ NA’I” – OBRIGADA MADRE ALMA CASTAGNA

Venilale – Komunidade Maria Auxiliadora, Irmán sira hamutuk ho labarik orfán sira no kolaboradores sira ho laran ksolok hasa’e hahí no agradese Maromak ba grasa oi-oin ne’ebé simu, iha loron 22 Agostu. Liu husi selebrasaun Eukaristia ne’ebé selebra husi padre Jacinto Tadeu Gusmão,SDB, iha tuku 06.30 dader iha orfanatu São Domingos Savio, ami agradese ba Madre Alma Castagna ne’ebé sai nu’udar inan  no tali uniaun nian hodi gia ita nia inspetoria TIN liu-liu ba irmán FMA ida-idak .

Iha omilia padre hateten : Maria sai Maromak nia inan no ita nia inan mos, basá laiha Maria laiha Jezús, laiha Jezús laiha salvasaun. Maria iha mak salvasaun mosu basá Maromak empresta Maria nia knotak atu salvasaun mai iha mundu. Maria nafatin hahí Maromak, nune’e ohin ita mos  agradese ba Madre Alma  ne’ebé sai nu’udar inan  no ida ne’ebé mos prontu atu tau matan ba ema ida-idak.

Obrigada Madre Alma, ba diak hotu ne’ebé ita halo no hatudu ba ami ida-idak, iha loron agradesimentu ida ne’e ita harohan no agradese Madre Alma ba ninia serbisu animasaun nian, ba ninia akompañamentu, sasin moris no fiar nian ho radikalidade hodi hametin tali uniaun no fraternidade nian. Atu Maromak haraik bensaun wain ba Madre nia intensaun, saúde,misaun no familia.

Obrigada barak!

(Cesarina Correia FMA)