Venilale – Iha loron selebra Santa Maria Virjen Liura-Feto, komunidade hotu iha Inspetoria TIN (Timor-Indonesia) agradese Maromak ba Madre Alma Castagna, provinsiál.

“Ha’u Klamar hahi Na’i” mak tema ba festa gratidaun. Festa gratidaun ba tinan ida ne’e realiza iha komunidade idak-idak FMA nian. Iha komunidade, iha loron 20 halo tiha lectio hodi foti empeñu karidade nian. Ida mak “orasaun” ba ita-nia Rain, atu sai livre husi korrupsaun, injustisa no diskriminasaun oioin. Empeñu seluk mak sei bá vizita ema ne’ebé presiza tulun.

Tan ne’e ohin, iha Eukaristia Santa, Irmán sira komunidade Madre Mazzarello ho edukadór/a no alunu/a ETV hamutuk hasae hahí no agradese ba Maromak ba Maromak ba ninia di’ak hotu liuhsi madre Alma.  Ita harohan no agradese ba Madre Alma ninia serbisu animasaun iha tinan ida-ne’e nia laran. Ita agradese ba akompañamentu, ba sasin fiar no radikalidade hodi hametin tali uniaun no fraternidade nian iha tempu prova moras covid 19 nian.

Eukaristia selebra husi padre Abrão Pinto iha kapela komunidade nian. Iha omilia selebrante hateten katak Magnificat mak knananuk Maria nian ne’ebé hananu ba Maromak ba kmanek oinoin ne’ebé Na’i halo iha Maria nia moris, liu-liu hili nia atu kous Nia Oan Mane. Ho ida ne’e mak Inspetoria TIN mós agradese ba Maromak ba prezensa madre Alma ne’ebé nu’udar biin no inan akompaña ona irmán no foin-sae sira.

Iha momentu agradesimentu nian grupu asosiasaun sira ne’ebé partisipa iha Lectio Divino, lee sira nia agradesimentu ba Maromak.

Magnificat

“Na’i  ami agradese Ita tan Ita Boot tau matan nafatin mai ami no nunka husik ami ne’ebé moris hamutuk iha familia Salesiana” (Laudato Si).

“Ami agradese Ita, tan Ita haraik família ne’ebé hatene tau matan mai ami idak-idak husi kiik to’o boot” (Auxilium).

“Ami agradese Na’i, ba prezensa Madre Alma nian iha ami leet ne’ebé akompaña ami foin-sae sira” (Animadores).

“Ami agradese ba Ita Na’i, ba terus no susar ami hasoru maibé, Ita nafatin akompaña ami, fó kbiit no grasa hodi sai husi difikuldade hotu” (Mazzarello).

“Ami agradese Ita Na’i, ba grasa ne’ebé loron-loron Ita-Boot haraik nafatin mai ami liu husi madre sira no edukadór/a sira. Ami agradese mós ba Ita ba ami-nia benfeitór sira ne’ebé suporta nafatin ami-nia estudu” (Cimatti).

“Ami klamar hahi no hanai Ita, basá Ita la para atu habosu ami isin no klamar ho Ita Futar Isin no Ran, ne’ebé ami simu loron-loron iha Eukaristia” (Laura Vicuña).

“Obrigada Na’i, ba ami-nia moris hamutuk nu’udar biin no alin iha espíritu familia ida deit, hodi fahe ksolok no susar hamutuk” (DB).

(Redasaun / Alice Filipe)