Festa agradesimentu EBC Maria Auxiliadora
OBRIGADO PELA VOSSA PRESENÇA
Dili – Depois de halo preparasaun durante loron sanulu nia laran, hodi reza no agradadese ba malu, iha loron: Sabado, 24 Outubro 2020, EBC MARIA AUXILIADORA-COMORO, selebra hamutuk festa agradesimentu eskola nian. Momento furak atu hahi no agradese Maromak ba diak tomak nebe Ami simu iha tinan ida nee. Agradese ba madre FMA sira hotu liu-liu ba Madre Superiora, Me. Sebastiana da Costa, FMA ho irman sira hotu iha komunidade Beata Eusebia Palomino, ba Padre Kapelaun sira, Professores sira, Trabalhadores, Benfeitores, Komunidade Edukativa, Aman – Inan no ba prezensa alunu ida-idak husi Pre-escolar too 9o ano.
Festa Agradesimentu ida nee hahu ho Selebrasaun Eukaristia iha oras: tuku 8:00 iha Paroquia Maria Auxiliadora. Selebrante mak Padre Provinsial, Pe. Apolinario Neto, SDB. Iha nia homilia, Padre hatoo nia parabens ba Eskola Maria Auxiliadora, tanba tinan tinan la haluha atu fo agradese ba Maromak ba grasa hotu nebe sira simu no fahe ba malu. Padre fo korajen ba manorin sira, madre sira atu nafatin iha korajen hodi halao misaun nee ho diak hodi eduka foinsae no labarik sira atu sai sarani diak no sidadaun nebe honestu. Agradese mos ba Nain Feto neebe sai protetora ba eskola Maria Auxiliadora.
Depois de misa, alunos sira fila fali ba eskola hodi kontinua ho atividades sira, hanesan: Serimonia koa kek, Jogos, merenda hamutuk no aprezentasaun husi 9o ano sira (sira nia agradesemento ba eskola no professores sira). Jogos sira mak hanesan: dansa kadeira, halai karon, estafeta, tata berlindos, halai kesi ain, dansa balaun, tata krepuk no ikus mak jogos vollibol husi manorin no madre sira. Ikus mak taka ho kanta agradese no orasaun hamutuk.
Maske tinan-tinan, husi Eskola nafatin organiza festa agradesemento, maibe tinan-tinan iha nafatin esperiensia furak ruma nebe rai iha ema ida-idak nia fuan. Festa agradesemento laos halo tan halo deit. Maibe atu tulun alunos sira atu nafatin hatene agradese. Agradese ba buat hotu-hotu nebe akontese iha iha ita nia moris. Obrigado mak liafuan magico ida nebe Amo Papa Fransisco konvida ita atu bele espresa iha ita nia moris lor-loron nian (iha liafuan magico tolu: “Obrigada, lisensa no deskulpa”). Nune’e ho ksolok ita dehan OBRIGADO ba malu.
Mercita no prof. Ana Izaura
