Dili – Ho festa Aprezentasaun Na’i nian ohin sai mos loron mundial vida Konsagrada nian no ho modo espesial liu tan mak ohin halo tinan XXV vida konsagrada ne’ebe São João Paulo II institui iha 1996. Nune’e ohin loron 2 fevereiro 2021 relijiozu no relijioza sira selebra hamutuk Santa misa iha Catedral –Dili ne’ebe prezide husi Arsebispo Don virgilio do carmo da Silva-SDB.

Amu Arsebispu haktuir iha nia omilia katak “Festa ida ne’e sai mos oportunidade ida mai ita konsagrada sira atu selebra ita nia konsagrasaun no agradesimentu ba Maromak ba Don vokasaun ne’ebe ita simu hodi hametin liu tan ita nia deseju atu tuir Kristu ho radikal, iha misaun nia orijen ne’ebe mai husi Maromak no iha Nia de’it. Iha Evanjellu ohin, São Jose ho Nain Feto lori kosok oan ba hasae ba Maromak iha Templu, fo hanoin mos mai ita katak, oan ne’e la’os inan aman nia propriedade maibe Maromak entrega de’it ba sira atu kuida no tau matan to’o boot, hanesan Amu Papa Francisco dehan: Maromak halo planu mai ita ida-idak nafatin nakonu ho Nia domin. Ksolok boot liu mai ita fiar nain ida-idak mak konsege no bele hatan ba bolu ida ne’e, hodi saran ita nia-an tomak ba kna’ar ida ne’e no ba maun alin sira nia diak. Ne’e mak razaun dahuluk mai ita, ohin atu agradese ba vokasaun ne’ebe Maromak haraik mai ita”.

Amu hatutan tan katak “iha 2017 Amu Papa Francisco wainhira koalia kona ba vida konsagrada sira nia dehan: iha momentu ne’e fidelidade iha prova boot ida… ita hasoru hela hemorragia ne’ebe enfrakese vida konsagrada no kreda nia moris, preukupa ho sira ne’ebe husik kongregasaun, los duni katak iha balun ne’ebe husik tanba falta koerensia ba moris, balun passa tiha tempu barak neineik lakon sira nia fidelidade, dala ruma mos akontese depois de votu perpetua. Ida ne’e preukupasaun ida uma Kreda nian; no konvite ida atu ita hotu hola konsiensia serio kona ba ne’e… la’os atu hatan kedas maibe konvite ida atu haklean refleksu ne’e… iha Evanjellu mos haktuir kona ba Simeão; ema ne’ebe justu hanesan S. Jose laran mos laiha inklinasaun ba paisaun maibe buka verdade. Ema pio katak la’o nafatin tuir Maromak Nia Liafuan, nunka ses husi Maromak Nia hanorin tanba nia matan bele haree buat ne’ebe ema seluk labele haree. Espiritu santu mos horik iha nia, tan ne’e halo nia komprende katak nia sei lamate wainhira seidauk haree Mesias. Espiritu halo nia hatene hateke ba oin nunka fila ba kotuk no nia lakohi fila fali atu sai joven tanba nia moris diak ona. Nia mos latauk maibe ho ksolok ba hasoru nia mate hodi dehan husik ita atan ba ho dame. Espiritu ne’ebe hamahan Simeão, konvida mos ita ba misaun ida ne’e, hanesan iha Ezortasaun S. João Paulo II dehan: konsagradu no konsagrada sira mak los duni espertu iha komuñaun no espiritualidade. Tan ne’e mai ita konsagrada sira buka atu hatudu nafatin ba Maromak atu halo ita sai duni Nia instrumentu domin nian ba mundu ohin loron”.

Fulan Fevereiru ne’e, Amu-Bispu Virgilio husu atu Dioseze Dili tomak harohan ba konsagru no konsagrada sira atu sira moris ho fidelidade no laran-manas sira-nia cvokasuan no misuan.

(Onesiana FMA)