Amu-Papa Francisco nia lia-menon ba Irak iha loron molok viajen

Peregrinu penitente, peregrinu dame nian no konvida irakianu sira atu kontinua Abraun nia dalan, “iha esperansa”, hodi la hasees hateken ba fitun sira. Iha video mensajen ba Povu Irak iha vijília ninia viajen apostólika da-33 , husi 5-8 Marsu. Papa Francisco esplika ninia bá “imi-nia rain, knuuk sivilizasaun nian antiga no estraordináriu”, liuliu nu’udar “peregrinu penitente”.

Atu husu ba Na’i, perdaun no rekonsiliasaun, depoizde tinan sira funu no terroirizmu nian, atu husu ba Maromak konsolasaun ba fuan sira no kura ba kanek sira.

PEREGRINU DAME NIAN NE’EBÉ BUKA FRATERNIDADE

Maibé mós “nu’udar peregrinu dame nian, atu tenik” hanesan Jezús iha Evanjellu Mateus nian: “Imi hotu mesak maun-alin [“Voi siete tutti fratelli”]…

Ne’ebé buka fraternidade, animadu ho dezeju atu harohan hamutuk no la’o hamutuk, ho maun no biin-alin sira husi tradisaun relijioza seluk, iha sinál aman Abraun nian, ne’ebé halibur iha família ida de’it, musulmanu sira, ebreu sira no kristaun sira.

ENKONTRU HO KREDA MÁRTIR

Amu-Papa dirije liuliu ba kristaun irakianu sira, ne’ebé “fó sasin fiar iha Jezús iha prova todan liu nia laran”, no “iha onra atu hasoru Kreda mártir ida: obrigadu ba imi-nia sasin”. Mártir barak liu ne’ebé imi koñese, Amu-Papa  harohan  bele “tulun ita persevera iha forsa domin nian ne’ebé haraik-an”. No Amu-Papa mós fó hanoin “imajen sira uma sira ne’ebé rahun no Kreda sira ne’ebé hetan profanasaun” ne’ebé irakianu sira halai husi Isis nia hirus sei iha hela sira-nia matan, no iha fuan “kanek sira husi domin ne’ebé husik hela no hela-fatin ne’ebé abandona hela”.

Ha’u hakarak lori Kreda tomak nia hamaus domin nian, ne’ebé besik ba imi no Médiu Oriente ne’ebé hetan martíriu no enkoraja imi atu la’o bá oin. Ita keta husik sofrimentu terrivel ne’ebé imi esperimenta no halo ha’u terus, manán ita.

HANESAN ABRAUN, HATEKE BA FITUN SIRA

“Ita keta deziste iha propagasaun aat nia oin: ne’e mak Amu-Papa nia apelu, basá “bee-matan antigu sabedoria imi-nia rain nian orienta ita ba buat seluk, atu halo hanesan Abraun ne’ebé, maski husik buat hotu, nunka lakon espernsa”. Hodi konfia iha Maromak, Abraun “fó moris ba dexendénsia sura-laek ida hanesan fitun sira lalehan nian”. “Ita hateke ba fitun sira – ne’e mak ninia konvite – Iha-ne’ebá mak ita-nia promesa”.

REFORSA FRATERNIDADE, IHA TEMPU SIRA PANDEMIA NIAN IDA-NE’E

Hafoin Papa Francisco dirije ba irakianu sira hotu “ne’ebé sofre maka’as, maibé nunka dezespera: Ba kristaun sira, ba musulmanu sira maibé mós ba yazidi sira “ne’ebé sofre maka’as” hodi bolu sira “hotu-hotu maun-alin”. Nu’udar “peregrinu esperansa nian” nia fó hanoin katak “husi imi, iha Nínive, nalian profeta Jonas nia lian, ne’ebé impede destruisaun no lori esperansa foun, esperansa Maromak nian”.

Mai ita husik esperansa ne’e daet ita,  fó korajen atu harii filafali no hahú filafali. No iha tempu susar pandemia nian, ita tulun atu reforsa fraternidade, atu hamutuk hari’i futuru ida dame nian. Hamutuk, Maun no biin-alin sira husi tradisaun relijioza oioin.

KONTINUA ABRAUN NIA DALAN, HODI LA’O IHA DALAN DAME NIAN

Amu-Papa remata hodi fó hanoin ba irakianu sira katak “husi imi, miléniu liubá, Abraun hahú nia dalan”, no ohin “husik mai ita atu kontinua, ho espíritu hanesan, hodi la’o hamutuk dalan dame nian!”. No hanesan Abraun, “la’o iha esperansa no nunka husik atu hateke ba fitun sira”.