Balide, 20 – 06 – 2021

Dezastre naturais ne’ebe akontese iha rai laran, liu kle’ur ona, maibé vitima sira ba dezastre ne’e, balun la hetan tulun, tamba sira nia hela fatin ne’ebe izolado no dook husi sidade.

Iha loron 2 ne’e, ami irman FMA komunidade Balide hamutuk ho Pe. Mario Sousa, SDB no irmaun sira husi komunidade Casa Provincial ho laran kmaan ba hala’o asaun karidade iha Mota Ulun no bairo Susan, suku Hera nian. Fatin sira ne’ebe ami to’o ne’e, izoladu no dook husi estrada boot. Ami hatene fatin sira ne’e tamba informasaun ne’ebe ami hetan husi Padre Carmelito sira.

Familia sira ne’ebe ami hasoru hamutuk uma kain 22, sira moris simples liu, maske sira kuran ba buat hotu maibe sira moris ho ksolok no oan sira ba eskola maske tenke la’o kilometer barak atu to’o Hera. Sasan ne’ebe ami lori mak sasan uma laran nian, hahan no hatais. Sira haksolok no agradese tebas ba tulun ne’ebe sira hetan.

Ami haksolok tebes atu hala’o asaun karidade ne’e. Ami mos agradese ba sira hotu ne’ebe tulun ami iha material no finansiamentu nune’e ami bele realiza aktividades ne’e. Liu-liu ami agradese ba foinsa’e sira ne’ebe servisu iha Australia, PTSC Darwin no Inspetoria, ami promete nafatin ami nia orasaun. Obrigada barak.

Komunidade Balide.