Dili- husi loron 6-10 Agostu 2021, Hamutuk ho Ir. Esmeralda Soares FMA, ami reflete no haree fila fali moris fraterna tuir dokumentu sira kreda nian, konstituisaun, no surat sira Don Bosco no Madre Mazzarello nian ne’ebé liga ba vida fraterna.

Dokumentu sira kreda no konstituisaun nian dehan katak : Vida fraterna hetan nia abut iha Santissima Trindade ne’ebé domin mak anima. Iha moris komunidade nian ita tenke hatudu ita nia komunaun fraterna, nu’udar fatin atu halo esperiensia kona ba Nai nia prezensa. Ida ne’e bele, se iha domin resiproku entre ita. Komunidade ida ne’ebé selebra Eukaristia hamutuk, purifika-an iha sakramentu rekonsiliasaun no harohan ba uniaun nu’udar presente husi Espiritu santu.

Don Bosco dehan “imi buka atu hadook-an husi liafuan sira ne’ebé lori ba mura-mura, liu-liu hasoru imi nia maluk sira. Keta se tilun ba liafuan sira ne’ebé ema seluk hateten kona ba imi nia maluk, se imi rona liafuan ruma kontra ema ruma pratika ba buat ne’ebé Espíritu Santu hateten : ó rona tiha ona liafuan ruma kontra ó-nia maluk? Husik liafuan ne’e mate iha ó nia laran” ( Sir 19:10). Madre Mazzarello mós husu ba nia irman sira atu hadomi malu ho domin momoos, domin Kristu nian. Tan ne’e iha ninia surat sira nia hakerek klaru liu hodi dehan “imi hotu hadomi malu? imi iha karidade ba malu?”

Iha loron hirak ne’e nia laran sai momentu atu ami avalia fali ami nia moris fraternal iha komunidade liu husi reflesaun pesoal no sharing sira. Momentu ne’e mós tulun ami atu haree fali desafiu sira ne’ebé halo moris fraterna la iha komunaun ho roman Maromak nia lia fuan no konstitusaun.

Deskobre tiha desafiu sira, iha loron ikus ami halo selebrasaun, halo rekonsiliasaun hodi rekoñese atitude no hahalok sira ne’ebé la tulun atu harii vida fraterna no ami ida-idak empena-an atu ho Maromak nia grasa moris tuir buat ne’ebé konstituisaun husu….

( Irman sira Segundo novisiadu )