Artigu tuirmai mak partilla ne’ebé Ir Jacinta Gusmão halo iha webinar kona-ba Laudao Si’ platform iha 14 Janeiru 2022, organiza husi kampaña “Seminare speranza per il pianeta” ho lia-inglés, lia-italianu, lia-españól no lia-fransés.

 

Empeñu ho Plataforma Inisiativa Laudato Si’

Dili – Ir. Sheila Kinsey, FCJM, Koordenadora Kampaña UISG “Seminare speranza per il pianeta” hala’o webinar ida kona-ba “Empeña an iha Platafora Laudato Si’ nian no husu ba Inspetora FMA TIN atu partilla esperiénsia inskrisaun iha plataforma Laudato Si’ iha webinar kona-ba Plataforma Laudato Si’. Ba ne’e, Ir Alma Castagna husu ba Ir Jacinta Gusmão atu fahe esperiénsia relasiona ho prosedimentu sira inskrisaun nian iha  plataforma.

Webinar ne’ebé Ir Sheila rasik mak modera, fahe ba sesaun tolu: sesaun 1 kona-ba Mensajen sira empeñu nian ho Plataforma Inisiativa Laudato Si’ nian husi Komisaun Justisa no Pás no Integridade Ambiente nian USG-UISG nian (Sr Noelle Corscadden, IBVM no P. Paulus Budi Kleden, SVD). Sesaun 2 mak “Hakle’an ita-nia komprensaun kona-ba Plataforma iInsiativa Laudato Si’ nian hato’o husi señora Maureen Villanueva, Responsavel ba Empeñu sira ba projetu espesiál  Movimento Laudato Si’ nian. Ninia aplikasaun konkreta mak partilla esperiénsia prosedimentu inskrisaun nian husi Ir Jacinta Gusmão, FMA. Ba sesaun 3 iha partilla kona-ba esperiénsia husi Irmán sira “Missionária S. Colombano” nian kona-ba oinsá reajen ba atividade minerária sira ho “non-violence”.

Saida mak FMA TIN halo iha prosesu inskrisaun nian

Papa Francisco konvoka Tinan Aniversáriu Laudato si’ (24 Maiu 2020-24 Maiu 2021) no inisiativa ba tinan hitu atu akompaña komunidade sira mundu tomak nian atu to’o ba tranzisaun ba sustentabilidade iha espíritu ekolojia integrál Ensíklika Laudato Si’ nian. Prosesu ne’e iha nivel mundiál la’o iha sintonia ho orientasaun sira Kapítulu Jerál XXIII (22 Setembru-15 Novembru 2014)  no preparasaun ba KJ XXIV (2019-2020).

Defaktu, iha preparasaun ba KJ XXIV (2019-2021), komunidade edukativa sira, hodi tuir metodolojia “rekoñese, interpreta no hili”  avalia kona-ba onsá moris “konversaun ekolójika” ne’ebé KJ XXIII husu.

 Dalan ne’e kontinua ho forsa liután, ho deliberasaun kapitulár 2021 nian ne’ebé dehan:

Asembleia Kapitulár husik
foin-sa’e sira,
kiak sira no Rai nia hakilar interpela nia
no hakotu lia atu envolve Institutu tomak
iha dalan konkretu no permanente konversaun nian ba ekolojia integrál,
hodi asume Laudato si’ nia objetivu hitu, iha rede
no ho Sistema Preventivu nia estilu.

Nu’udar ain-hakat dahuluk atu konkretiza deliberasaun KJ XXIV nian mak asume empeñu atu rejistra an iha Plataforma Insiativa Laudato Si’ nian.

Husi Ámbitu Pastorál Juveníl Sentru nian haruka matadalan oinsá halo inskrisaun nu’udar Inspetoria, komunidade, asosiasaun, família, eskola. Ain-hakat sira-ne’ebé halo mak uluknanai inskrisaun online iha https://piattaformadiiniziativelaudatosi.org/; hafoin inskrisaun ofisiál hodi haruka Surat ba Prefeitu ‘Dicastero per il Servizio di Sviluppo Umano Integrale’, liuhusi email info@humandevelopment.va. Surat ida nia kópia haruka mós ba Ámbitu Pastorál atu bele haruka surat ne’e ho forma surat-tahan nian ba Sidade Vaticano nian.

Depoizde inskrisaun, husi plataforma husu atu halo auto-avaliasaun kona-ba objetivu hitu LS nian. Ba FMA Tin ladún susar tanba ita foin halo avaliasaun sira iha nivel komunitáriu, iha preparasaun pré-kapitulár, iha nivel inspetoriál no kapítulu inspetoriál. Husi plataforma fó feedback kona-ba auto-avaliasaun no oferese proposta sira atu implementa objetivu hitu Laudato Si’ nian.

Ain -hakat datoluk mak halo programasaun ka planu asaun Laudato Si’ ba komunidade, ba eskola, ba asosiasaun OPIAM no ba Movimentu Juveníl Salezianu.

Planu asaun Inspetoria TIN nian

Planu asaun Laudato Si’ Inspetoria TIN nian mak tuirmai:

• Elimina uzu plástiku uza-soe nian;
• Instala solar panel ba konstrusaun foun;
• Promove produtu lokál sira;
• Buka no fahe ho komunidade sira orasaun no reflesaun sira espiritualidade ekolójika nian’
• Durante retiru anuál Irmán sira-nian, dedika kalan ida-idak ba momentu ida reflesaun nian (Buona Notte) ba objetivu ida-idak Laudato Si’ nian.

Empeñu sira komunidade Eusebia nian ba tinan 2022:

• Hala’o planu Inspetoria nian;
• Hakle’an ensíklika Laudato Si no Fratelli Tutti;
• Halo estrume orgániku;
• Jere bee reziduál sira;
• Inklui ka hatama edukasaun ekolójika iha formasaun no iha eskola;
• Resikla buat ne’ebé bele;
• Promove partilla soin sira;
• Organiza eventu sosiál/ekolójiku sira (la’o ho Dioseze no durante Loron Rai nian no Tempu Kriasaun nian’;
• Harohan no selebra durante Tempu Kriasaun nian.

Mai ita hamutuk tau ita-nia forsa no rekursu sira no partisipa ho modu ativu atu harii futuru ida di’ak liután.

(JG)