Dili, Eskola Maria Auxiliadora-Comoro, 8 Abril 2022.

Retiro preparasaun ba festa Pasqua.

By: Prof.Salvador

Dili – Atu bele selebra didiak festa Pasqua ne’ebé besik dadaun ona, ohin alunos Eskola Maria Auxiliadora sira hotu ne’ebé halo ona Primeira Comunhão, halao sira nia retiro ho tema “Ita mai husi ne’ebé no fila ba ne’ebé?” husi Pe. Matias, SDB (director Escola S. Pedro) nudar predikador. Iha ninia predikasaun pe. Matias tulun alunos sira atu hatene didiak ita nia origen. Nia hateten katak ita hotu mai husi Maromak no fila fali ba Maromak. Hanesan ema maksalak ita mai husi rai no fila fali ba rai. Ita mai husi Maromak tan ita iha isin no klamar. Hanesan ita fo han didiak ita nia isin atu bele hetan isin diak, nune’e ita mos presiza fo han ba ita nia klamar. Nu’udar ema maksalak ita presiza hadia-an liu husi Sakramento Konfesa.

Atu tulun alunos sira bele halo didiak sira nia konfesaun, Padre haktuir ba sira Aiknanoik ida kona ba “Oan ne’ebé lakon”. Iha ne’e Padre esplika oitoan Aiknanoik ida ne’e hodi sublinha pontu ruma: Aman ne’ebé iha rikusoin barak atu fahe ba nia oan sira, oan mane boot ninia attitude, oan mane kiik ne’ebé lori nia riku soin ba gasta tuir nia hakarak no ikus mai nia arepende no hakarak fila fali hodi husu perdaun ba nia aman, Aman ne’ebé laran sadia simu fali nia oan no halo festa ba oan ne’e. Padre kontinua hodi dehan aiknanoik ne’e hakarak dehan katak nudar ema maksalak ita nafatin monu ba sala maibe ita tenke sai hanesan oan kiik, wainhira halo sala ita tenke hakribit sala sira ne’e hodi hakbesik fila fali ba Aman Maromak liu husi Sakramento Konfessa. Tamba Jesus mos dehan katak ha’u mai ba ha’u nia bibi sira ne’ebé lakon, tamba ne’e nia husik hela bibi 99 hodi ba buka fali ida ne’ebé lakon. Ne’e grasa boot ida. Wainhira ema maksalak ida fila fali ba dalan los, ne’e grasa ida. Tamba ne’e, retiro mak dalan ida atu fo hanoin fali ita no hare fila fali ita nia hahalok sira, hanoin fila fali sala sira ne’ebé ita halo ona, hodi fila fali ba Aman Maromak liu husi Konfessa.

Depois de padre nia predikasaun, padre prepara fila fali alunos sira ba konfesaun hodi halo selebrasaun penitensial. Hotu tiha aluno sira hakbesik ba Nailulik sira hodi halo konfisaun. Obrigada barak ba Nailulik sira nia disponibilidade e Feliz Pasqua ba alunos sira hotu.