Dili – Tradisionalmente Segunda, Tersa no Kuarta Semana Santa nian dedika ba preparasaun Liturjia boot ne’ebé sei selebra husi loron Kinta to’o nia tutun iha Domingu Resureisaun. Nue’e mak, Komunidade Edukativa Eusebia Palomino dedika loron Tersa ba Preparasaun espirituál iha silénsiu no raronak ba Maromak no hakbesik an ba Sakramentu Rekonsiliasaun.

Ba preparasaun ne’e, Diretora Eskola, Ir Suzana Santos Alves husu Pe. Agostinho Soares SDB atu fasilita, uluknanai ho meditasaun ida no hafoin hodi administra Sakramentu Rekonsiliasaun. Tema ne’ebé Padre Agostinho hato’o iha ninia meditasaun mak “Maromak nia domin no mizerikórdia no ita-nia resposta ba Maromak nia domin no mizerikórdia”.

Iha ninia reflesaun, Padre Agostinho subliña katak Maromak ko’alia mai ita horiuluk kedas liuhusi profeta sira no ikusliu husi nia Oan, Jezús Kristu. Jezús mak tutun revelasaun Na’i nian no kumprimentu promesa salvasaun ba umanidade maksalak. Hahú husi nia moris mai, liuliu iha ninia moris públika, nia haklaken ho liafuan no hahalok, Maromak nia domin no laran-sadia, Maromak nia preferénsia ba ema kiak, ki’ik, maksalak. Atu hala’o misaun ne’e, Jezús tenke liuhusi terus/paixaun, mate no moris-hi’as, ne’ebé ita hotu oras-ne’e koko no moris daudaun. Liafuan ikus Maromak nian mak Moris-Hi’as, mensajen esperansa nian mai ita hotu.

Ita-nia resposta ba Maromak nia domin no mizerikórdia liuhusi ita-nia domin iha nia aspetu vertikál (ba Maromak) no orizontál (ba maluk sira). Nia objetivu mak SANTIDADE; MORIS-HI’AS HO JEZÚS; KSOLOK  ROHAN-LA’EK; DOMIN NAKONU. Santidade mak ita hotu nia objetivu, santidade ida de’it, maibé dalan mak la hanesan, maibé tuir ida-idak nia vokasaun. Vokasaun ne’e mak determina oinsá ita-nia relasaun ho Maromak no ho maluk sira, hanesan S. Francisco de Sales hanorin iha nia livru Vida Devota.

Padre Agostinho fó mós ezemplu ruma, hodi kompara kaben-na’in ida nia moris no relijiozu/a ida nia moris. “Ba sarani kaben-na’in, nia orasaun badak, la’ós naruk hanesan relijiozu ida. Se feen ida ba missa loroloron no nia oan sira la han molok ba eskola, ne’e la’ós buat loos. Se relijiozu ida la halo meditasaun loroloron, ne’e nia moris relijioza sei sai oinsá loos?” Se ha’u-nia vida profisionál mak profesór/a, ha’u hala’o dalan santidade hodi moris di’ak relasaun ho ha’u-nia kolega no Irmán sira iha eskola; iha tratamentu hanesan, respeitu, atensaun ba estudante sira maski sira ki’ik; iha preparasaun ba tempu hanorin, buka dalan atu hanorin di’ak, halo estudante gosta matéria, nst.

Momentu ikus mak ida-idak hakbesik ba sakramentu konfisaun no rekonsiliasaun.

(JG)