Fatumaka – Iha selebrasaun tinan 150 fundasaun Institutu nian, konvida atu halo pasu konkretu rekonsiliasaun nian, nu’udar dalan ne’ebé Inspetoria hili hodi selebra festa boot ne’e. Nune’e iha loron 13 ami irmán sira komunidade, hala’o selebrasaun Rekonsiliasaun. Momentu atu hafoun ami an atu pratika fó perdaun no simu perdaun. Nune’e ami bele kontinua serbisu hamutuk hodi harii Maromak nia reinu no habelar nafatin karizma ne’ebé ami simu.

Hafoin iha loron 14, komunidade halo peregrinasaun ba Santuariu Maria Auxiliadora Fatumaka. Uluknanai agradese Maromak ba buat kmanek oioin ne’ebé Na’I haraik ona ba Institutu iha tinan 150 nia laran, maibé liuliu husu atu bele hetan prezente grasa nian liu husi Inan Doben Tulun Na’in nia intersesaun.

Iha Tersu peregrinasaun nian, tulun tebes ami reflete Maria nia virtude sira no ida ne’e fó hanoin mai ami nu’udar nia oan feto sira atu kontinua laran metin ba nia. Nune’e mós ho pergunta sira ne’ebé ami reflete, halo ami konxiente liután ba sentidu hola parte iha Institutu. Iha ne’ebé ami simu knaar atu kontinua espíritu Valdoko no Mornese nian. Serbisu ba Gloria Maromak nian no ba salvasaun ema hotu nian liuliu foin-sa’e no labarik sira. Ikus liu, taka ho Eukaristia ne’ebé selebra husi Pe. Antonio Maria Guterres SDB.

(Alice Filipe FMA)