Venilale 20 Agostu 2022 –  Nu’udar oan feto sira ba Maria Inan tulun na’in no ho fuan gratidaun nian, ami irmán sira komunidade rua iha Venilale selebra festa aniversariu fundasaun Institutu nian ba tinan 150 nu’udar komunidade. Nune’e hamutuk ho ami Familia Saleziana tomak- ADMA, Antiga Alunu/a, Salesianu Cooperador/a, komunidade Edukativa, estudante sira husi eskola sira iha Venilale no sarani sira, ami agradese Maromak liu husi Eukaristia santa ne’ebé selebra iha parokia Sagrado Coração de Jesus Venilale.

Eukaristia santa ne’e selebra husi Vigariu Provinsiál SDB Timor- Leste nian Pe. Manuel Pinto hamutuk ho Na’ilulik kooselebrante sira na’in 9. Iha omilia Amu selebrante hateten katak : “ Iha loron 5 Agostu liu ba FMA sira iha mundu tomak selebra tinan 150 fundasaun institutu nian tanba iha loron 5 fulan Agostu tinan 1872 moris Maria Doménica Mazzarello husi Inan Maria Auxiliadora nia tulun. Ohin ita selebra iha Mornese Timor nian- Venilale, ita agradese Maromak ba prezensa Maria Mazzarello liu husi nia oan sira ne’ebé kontinua Don Bosco no Maria Mazzarello nia misaun iha rai doben Timor Lorosae liu-liu ba labarik no foin-sa’e feto no mane sira nia edukasaun. Coragem! Vamos para frente com coração grande e generoso mak Maria Mazzarello nia liafuan, ohin liafuan ida ne’e kontinua halian iha irmán idaidak nia fuan tanba Maria Auxiliadora nafatin fó korajen no ksolok ba nia oan sira hanesan iha festa kaben Kana nian. Wainhira ita haree ba kotuk ita hetan ita-nia istória orijen nian, wainhira ita hateke haleu ita hetan ita-nia realidade, wainhira ita hare ba oin hetan ita-nia futuru no wainhira ita haree ba leten ita simu ita-nia gloria”. Nune’e Amu selebrante hameno mós ba irmán sira liafuan ne’ebé Papa Francisco dehan ba irmán kapitulares sira keta haluha grasa orijin nian. Hafoin husu mos ba ema hotu ne’ebé prezente atu kontinua harohan no agradese ba Maria Auxiliadora , hodi hakbiit nafatin FMA idakidak nia komitmentu atu eduka foin-sa’e sira no sai nu’udar sinal no espresaun Maromak nia domin ba foin-sa’e sira.

Depoisde Eukaristia, irmán diretora komunidade Maria Auxiliadora Ir. Olga Belo no irmán diretora komunidade Madre Mazzarello Ir. Carolina Correia, agradese  ba povu Venilale ne’ebé simu irmán  misionaria sira ne’ebé ohin halo ona tinan 34 prezensa  FMA iha Venilale. Agradese mos ba Familia Salesiana tomak ne’ebé nafatin serbisu hamutuk iha misaun no mós ba suporta no kontribuisaun hodi realiza festa ne’e. Agradese mos ba diretor/a eskola sira ne’ebé suporta no kontribui hodi fó tempu ba estudante sira bele tuir atividade sira ( Sertame, Danca Tiktok, Vocal Group no Pinta ) ne’ebé irmán sira halo nu’udar preparasaun ba festa ne’e.

Hafoin fahe premiu ba manan na’in sira ne’ebé hetan klasifikasaun iha atividade sira ne’ebé hala’o iha fulan rua liuba. Tuir mai nu’udar familia seremonia konfraternizasaun iha komunidade Madre Mazzarello no aprezentasaun dansa tiktok husi sira ne’ebé hetan klasifikasaun dahuluk no daruak no ikus taka ho drama Madre Mazzarello nian husi orfanatu S. Domingos Savio Venilale no kanta husi Irman sira komunidade rua.

(Alice Filipe FMA)