Dili – Loron Mundiál Misaun nian mak loron atu fanun fali iha sarani sira, maski ki’ik-oan sira mós, atu iha hakarak atu partisipa Kreda universál nia misaun, liuhusi sasin moris nian no haklaken Evanjellu, Nune’e mós oportunudade atu fó apoiu ba misionáriu sira liuhusi orasuan no solidariedade konkreta.

Ohin, labarik no adolexente misionária husi parókia Maria Auxiliadora anima liturjia Domingu XXX Tinan C Outubru misionáriu nian. Na’i bolu ita atu sai sasin Mizerikórdia no Fraternidade nian no konvida ita atu keta hanoin katak it amak di’ak liu ema seluk maibé atu sai solidáriu ho ema hotu no hatene simu Maromak nia mizerikórdia.

Adolexente sira halo ensenasaun ba Evanjellu iha-ne’ebé Na’i Jezús haktuir ai-knanoik figura farizeu no kobradór impostu ne’ebé ba harohan iha templu. Figura rua ne’e hanorin mai ita oinsá ita-nia relasaun ho Maromak no ho ema seluk. Ema farizeu hanoin nia an nu’udar ema justu nia agradese Maromak tanba nia la’ós hanesan ema kobradór impostu nian hodi despreza nia, nune’e hanoin katak buat hotu nia iha mai husi nia esforsu rasik. Kobradór impostu nian fali rekoñese nia an nu’udar ema maksalak no presiza Maromak nia laran-sadia, no tana nia la iha buat ida, nia komprende katak nia presiza Maromak no ninia mizerikórdia.

Iha loraik labarik no adolexente sira bá vizita família aleijadu rua atu harohan ho sira no mós oferese buat ruma. Família ida otas katuas no ferik ona, mane mak aleijadu, nia feen moras mear. Família seluk feen ho laen ema hanaran defisiente. Laen uza kadeira-roda, feen lae maibé nia mós iha ruin kleuk no la’o kudiek.Sira iha oan na’in tolu maibé ida ki’ik-oan mak hela ho sira.

Atividade sira-ne’e atu tulun labarik no adolexente sira sai konxiente kona-ba ema seluk nia nesesidade no iha fuan mizeirkordiozu.