Maria nia prezensa akompaña no sustenta etapa prinsipál sira Santa Maria Domenica Mazzarello nia moris nian, Kofundadora IFMA.

Povu Mornese nia devosaun
ba Maria Auxiliadora

Bainhira Maín moris, iha Mornese esperimenta hela konsekuénsia sira husi moras-kólera ne’ebé husi tinan 1835 mosu iha Piemonte. Mornese nia makhorik sira, ne’ebé sai vítima peste ne’e nian, sira husu Maria Auxiliadora nia tulun no, depoizde kólera, sira espresa sira-nia gratidaun ba Maria hodi dedika kapela ida, ne’ebé inaugura iha 24 Maiu 1843 ho bensan solene no loke ba públiku. Iha 1964 povu restaura kapela ne’e no tuirmai mós halo renovasaun, ohin loron nia sai sasin kona-ba povu Mornese nia laran-metin iha Maria Auxiliadora.

Maria nia konsolasaun
durante moras tifu

Iha uma ne’ebé ohin hanaran “uma tifu nian” nia oin iha pintura imajen ida ho títulu Auxilium Christianorum, imajen ne’ebé konserteza fó kmaan ba Maín durante nia moras naruk, akompaña nia no fó ba nia laran-metin. “Iha Maín nia tempu – Ferdinando Maccono hakerek – sábadu-sábadu ema halakan ahi-oan iha imajen ne’e nia oin, no iha domingu-domingu kalan, iha Maiu no iha estasaun di’ak, populasaun distritu ne’e nian halibur iha-ne’ebá atu resita rozáriu no hananu ladaiña sira ba liurai-feto lalehan. Konserteza Maín, bainhira nia isin di’ak, nia mós hamutuk ho feto no menina sira seluk”. “Tanba nia infánsia hala’o besik ba kapela ida dedika ba Auxiliadora, nia hetan filafali moris iha imajen Na’i-Feto nian ida nia hateken nia okos, invoka ho títulu Sarani sira-nia Tulun” (F. Maccono, Santa Maria D. Mazzarello, Kap. VIII, p. 83).

Maria Terus-Na’in no Imakulada

Bainhira Padre Domenico Pestarino filahikas ba Mornese husi Genova, nia lori kuadru furak liu Maria Addolorata nian, ne’ebé pintór husi Firenze Dolci ka ninia eskola mak pinta, no nia hakarak atu Koléjiu ne’ebé foin moris dedika ba Maria Addolorata. Addolorata mak mestra no modelu ba ‘Figlie dell’Immacolata”, entre sira-ne’e ida mak Maria Mazzarello.
Auxiliadora, Addolorata no Imakulada mak baze no forsa devosaun mariana Santa Maria Domenica Mazzarello nian: nia aprende terus ho domin no tanba domin, nia aprende banati tuir pureza fuan nian, livre husi preokupasaun mundu nian, atu halai hodi tulun no hanorin atu moris ho dignidade ba ema sira ne’ebé iha pergiu laran, uluknanai hahú ho menina sira husi nia rain, hafoin bá to’o nativu sira Patagónia nian, liuhusi ninia oan-feto sira.

Maria Auxiliadora mak Superiora

Jestu atu tau xave uma sira-nian iha Maria nia ilas nia ain bainhira Maria Mazzarello Superiora Komunidade FMA nian, mak jestu ida nakonu ho signifikadu sira: xave sira uma-nian pertense ba xefe família nian, nune’e ba Superiora katak Maria Auxiliadora, basá Madre Mazzarello konsidera nia an nu’udar Vigária; xave sira “loke no taka” no proteje intimidade uma nian, ne’ebé konfia ba Maromak nia Inan. Xave sira ne’ebé loke ba akollimentu; xave sira ne’ebé taka, konfidensialidade no protesaun família nian.
Elementu importante liu mak entrega, saran-an, konfiansa iha Maria, Inan ne’ebé hatene terus iha silénsiu no iha oferta moris rasik nian, hodi hatudu dalan roman nian ba nia oan sira no fó apoiu iha dalan bá to’o Reinu.