EVANJELLU – Lc 1,1-14

«Iha loron hirak ne’ebá Cesar Augusto fó sai ukun-fuan ida, hodi haruka ema iha mundu tomak atu ba tau naran. Ukun-fuan ne’e mak sira hala’o ba dala uluk wainhira Quirino mak emboot iha rai Síria. Ema ida-idak ba tau naran iha nia sidade rasik. Tan José mai husi David nia uma-kain, nia mós husik sidade Nazaré iha Galileia, hodi sa’e ba Judeia, ba David nia sidade naran Belém, atu tau naran ho nia kaben Maria, ne’ebé besik atu tur ahi. Wainhira sira sei iha ne’ebá, Maria nia loron atu tur ahi to’o daudaun. Nia tur ahi nia oan-mane boot, hodi haneras no hatoba nia iha balada han fatin, basá la iha fatin oan ida ba sira iha uma laran. Iha fatin ne’ebá iha bibi-atan balun, ne’ebé kalan kalan hein sira nia bibi iha rai luan. Na’i nia anju mosu ba sira. Maromak nia glória nabilan iha sira leet. Sira hakfodak tebtebes. Tuir mai anju dehan ba sira: “Imi keta tauk, basá ha’u lori liafoun di’ak ida ba imi, ne’ebé sei haksolok mós povu tomak: ohin iha David nia sidade foin moris ba imi Makso’in ida, katak Kristu Na’i. Sinál atu imi hetan Nia mak ne’e: imi sei hetan kosok-oan ida haneras no toba iha balada han fatin.” Teki-teki halibur hamutuk ho anju ne’e anju lubun boot ida ne’ebé hahí Maromak, dehan: “Glória ba Maromak iha leten aas bá, dame iha raiklaran ba ema sira ne’ebé Nia hadomi!”».

KOMENTÁRIU

Ohin, moris mai ita Na’i Makso’in. Ne’e mak liafoun di’ak Natál nian. Hanesan Natál ida-idak, Jezús moris hikasfali iha mundu, iha uma ida-idak, iha ita-nia fuan.

Maibé, kontráriu ho saida mai ita-nia sosiedade konsumista selebra, Jezús la moris iha ambiente ho sasán barak, kompras oioin, konfortu nian, ho han-hemu naresin. Jezús moris iha haraak-an balada han-fatin ida-nian iha balada nia luhan ka prezépiu.

No sai nune’e tanba ema sira rejeita nia: la iha ema ida fó fatin, iha uma ka iha estalajen. Maria no José, no Jezús ne’ebé foin moris, esperimenta saida mak rejeisaun, falta jenerozidade no solidariedade.

Ho Anju nia anúnsiu — «Imi keta ta’uk! Ohin ha’u haklaken ba imi ksolok boot ida, ba povu tomak mós» (Lc 2,10) — hotu-hotu halai ba prezépiu atu adora Maromak Oan. Uitoan ho ita-nia sosiedade, ne’ebé marjinaliza no rejeita ema barak tanba sira kiak, estranjeira ka simplesmente diferente, maibé selebra Natál hodi ko’alia kona-ba dame, solidariedade no domin.

Ohin, ita sarani sira haksolok, no ho razaun. Hanesan Saun Leão Magno afirma: «Ohin la loos atu fó fatin ba laran-triste, iha momentu ne’ebé  vida moris». Maibé ita labele haluha katak naximentu ne’e ezije kompromisu ida: hala’o Natál hanesan ho oinsá Sagrada Família hala’o: festa ne’ebé la’o hamutuk ho austeridade no pobreza. Maibé, se durante loron sira-ne’e ita la iha sentimentu loloos solidariedade nian ba marjinalizadu sira, ita hanesan makhorik sira Belém nian: la simu Kosok-Oan Jezús.