24 Maiu

FESTA MARIA AUXILIADORA NIAN

Evanjellu Jo 2,1-11

« Liu tiha loron tolu ema halo festa kazamentu iha Kaná, Galileia nian. Jezús nia Inan iha ne’ebá. Jezús ho nia eskolante sira simu mós konvite ba festa kazamentu. Tan tua la iha ona, Jezús nia Inan dehan ba Nia: «Sira la iha tua»”. Jezús simu hodi dehan: «Feto, ita hakarak saida husi ha’u? Ha’u nia oras ladauk to’o». Nia Inan dehan ba sira ne’ebé haree meza: «Imi halo buat hotu ne’ebé Nia dehan ba imi». Kusi neen iha hela ne’ebá, atu Judeu sira hamoos-an halo moos. Kusi ida-idak bele lori litru ualunulu ka atus-ida-ruanulu. Jezús lia tun ba sira: «Imi tau bee ba kusi sira ne’e, to’o nakonu». Sira tau bee nakonu didi’ak to’o ibun. Hafoin Jezús lia tun ba sira: «Imi bele hasai ona, lori ba uma-na’in tenda». Serví-na’in sira lori duni ba nia. Uma-na’in tenda koko tiha bee, nakfilak ba tua, tan nia la hatene tua ne’e mai husi ne’ebé, maibé, ema sira ne’ebé haree meza mak hatene hela katak sira kuru bee, nia bolu noivu hodi dehan: «Ema hotu fó uluk tua di’ak nian; ema sira hemu didi’ak ona, mak hafoin fó tua la dun di’ak. Ó fali, rai subar tiha tua di’ak, to’o oras ne’e». Ida-ne’e, iha Kaná Galileia nian, mak hahú sinál sira Jezús halo. Nia hatudu nia glória, nia eskolante sira fiar tebes Nia».

Reflesaun

Maria prezente iha festa kazamentu. Nia iha-ne’ebá, partisipa iha noivu sira-nia ksolok, hodi partilla iha buat hotu. Ninia prezensa mak profesia. Ninia prezensa mak don boot liu ba kazál foin-sa’e ne’e. Maria prezente, la’o book an iha ita-nia uma sira, no ida-ne’e mak don ida ne’ebé fó seguransa no profétiku.

No iha-ne’ebé iha Maria iha Espíritu ho ninia prezensa ne’ebé hamoris, katak Karizma.

Karizma salezianu mak Karizma prezensa nian. Bolun profétiku ita-nia karizma nian mak ida própriu prosimidade nian, asisténsia nian, iha estilu umilde maibé forte no efikás Maria nian. Nia prezente, besik, vijilante. Ita dalabarak taka an iha ita-nia an, iha ita- nia uma hodi haluha atu horik ho foin-sa’e sira.

Profesia ne’ebé Maria entrega mai ita mak ida prezensa nian, partilla nian, prosimidade nian iha moris baibain ne’ebé dalaruma bele dramátika, maibé ne’e mak moris, ne’e mak ita-nia foin-sa’e sira nia festa, “sira ne’ebé entrega mai ita”, hanesan lian ne’ebé dehan ba Main (Cronistoria 1).

Prezensa ne’ebé hanesan Maria nian, haree katak la iha tua. Maria rona drama festa ida-nian ne’ebé karik la sai ona festa. Maria ko’alia no entrega hakilar terus nian ba Oan Doben. Maria prezente kompletamente, la’ós indiferente.

Nune’e mós Don Bosco no Main haree foin-sa’e sira-nia drama no la sai indiferente. Foin-sa’e hira mak la iha ona tua: la iha ona evidénsia kona-ba saida mak konstitui sira-nia juventude, ksolok, entuziazmu, dezeju, paixaun. Foin-sa’e barak mak la iha futuru, lahó perspetiva, ne’ebé monu ba babeur sira husi ema sira ne’ebé faan mate.

Maria nia hakilar to’o ba nia Oan: Sira la iha tua! Oinsá ho ita? Ita tenke sai profeta sira espesialista iha raronak profundu, nune’e ho resposta barani nian tanba resposta evanjélika.

Maibé prezensa ida ne’ebé atua, laran-manas ne’ebé sai asaun, kriativa iha saran-an, hafoun an nafatin, prontu atu hatán ho rekursu sira grasa nian ba foin-sa’e sira-nia urjénsia sira. Maria hateten ba atan sira atu halo “buat hotu” Jezús dehan atu bele akontese milagre. Jezús mak halo milagre, maibé mai ita, Maria husu atu “halo buat hotu”. Ida-ne’e mak husi Don Bosco to’o Main, to’o Irmán no Irmaun ikus halo. “Halo buat hotu” sarak bele lori tua ksolok nian ba foin-sa’e sira.

(Padre Erino Leoni SDB)