EZERSÍSIU ESPIRITUÁL ANUÁL GRUPU II

 

Dili, 5 Juñu 2023

JG

Dili – Grupu daruak Irmán Saleziana (FMA) kompostu husi ema na’in 29 halo sira-nia Ezersísiu Espirituál Anuál husi loron 28 Juñu to’o 5 Jullu 2023, iha Comoro.

“Ezersísiu Espirituál anuál mak tempu privilejiadu atu halo esperiénsia intensa grasa nian, atu rona no medita Liafuan, atu komprende Maromak nia planu, hodi saboreia komuñaun ho Jezús ne’ebé dudu ita ba adezaun livre ba beibeik ba Nia iha don an rasik nian ba ema seluk” (Me. Chiara Cazzuola, Sirkulár n.1028).

Durante loron 8, iha «klima silénsiu no orasaun nian hodi haketak ho modu efetivu husi atividade ordinária sira permite atu realiza konfrontu vitál ida ho Maromak nia Liafuan no ho Konstituisaun sira nian» (Regulamentu 33). Defaktu, iha loron ikus Irmán sira, Irmán sira agradese tebes ba komunidade S. José no ekipa TOT tanba favorese ami atu moris iha klima refere.

Pregadór Ezersísiu Espirituál mak padre Agostinho Soares SDB no nia subliña katak retiru mak tempu atu hamanas fali ita-nia dalan ba santidade no Maromak haraik meiu oioin atu ita to’o liuhusi Kreda. Ne’e duni, nia artikula ninia pregasaun sira ho tópiku 12 ne’ebé bazeia ba Maromak nia Liafuan no Vaticano II nia hanorin sira. Tópiku sira ne’e mak: identidade vida konsagrada, orasaun, Eukaristia, Peniténsia, fidelidade iha vida konsagrada, amizade ho Jezús, vida komunitária, amizade iha vida relijioza, virtude haraik-an, lideransa no Maria.

Husi parte salezianidade nian, Ir Alma Castagna, provinsiál FMA-TIN, iha tempu “buonanotte” fó hanoin fali kona-ba Kapítulu Jerál XXIV nia hilin prioritáriu sira: formasaun, sinodalidade no ekolojia integrál. Ne’e mak Institutu tomak nia dalan iha tinan sira ne’e, no FMA ida-idak asume nu’udar ninia projetu moris nian.

Tempu Ezersísiu Espirituál, sai tebes duni tempu atu horik ho Na’i, no maski iha fasilitadór/a sira, protagonista prinsipál mak Espíritu Santu ne’ebé gia, no ezersitanda ne’ebé koopera ho Nia  atu konsentra iha vida espirituál no hafoun an iha fervór; meiu sira mak orasaun vokál no mentál, adorasaun eukarístika, Santa Missa, leitura espirituál, revizaun moris no ezame konxiénsia nian, kolókiu pesoál no penitensiál no renovasaun votu sira-nian.

Madre Mazzarello hanorin, tempu ne’e mak «tempu loos atu halakan filafali ahi» (Surat 27) no hodi halo didi’ak santu ezersísiu sira, Don Bosco hateten «Na’i nia grasa sira sei tun naresin hanesan udan iha ita, nune’e, ita hotu sei la’o ba oin, iha dalan santidade nian» (MB XIII, 126).

Santidade mak ita sira ne’ebé konsagra an ona ba Maromak nia finalidade ikus, no se ita la sai santa ita lakon leet de’it tempu. Domin no fidelidade ba Konstituisaun sira, nu’udar aplikasaun konkreta Maromak nia Liafuan nian, sai “matadalan seguru ba santidade no projetu moris nian ne’ebé orienta no tahan vontade atu realiza ita-nia vokasaun” (Konst.173).