RV – Amu-Papa nia katekeze kuarta 25 Marsu nian, mak orasaun hamutuk iha okaziaun Solenidade Anunsiasaun Na’i nian. Amu-Papa kontinua reflesaun kona-ba família.

“Ho Anúnsiu ne’e, Na’i leno no habiit Maria nia fiar, hanesan Nia halo mós ho nia kaben José, atu Jezús ne’e moris iha família umana ida. No ida-ne’e furak liu, basá hatudu mai ita oinsá mistériu Enkarnasaun kle’an liu, nu’udar Maromak hakarak, komprende la’ós de’it ko’us iha inan nia knotak, maibé mós simu iha família loos ida”.

Download

Papa Francisco fó hanoin katak, iha loron 25 Marsu, nasaun barak selebra loron Defeza Moris nian no, iha tinan 20 liubá, S. João Paulo II asina, iha data ne’e, Ensíklika Evangelium Vitae. Iha Ensíklika, Francisco hateten tan, “família okupa fatin sentrál enkuantu sai knotak ba vida umana”.

Amu-Papa hateten katak kabe-na’in sira simu bensan hhusi Maromak husi kedas nia hahú atu forma komunidade ida domin no moris nian, iha ne’ebé simu misaun prokriasaun nian. “Kaben-na’in sarani sira, hodi selebra sakramentu kaben, sai disponivel atu onra bensan ne’e, ho grasa Kristu nian, ba moris tomak”, Papa Francisco afirma, hodi dehan tan katak “ligasaun entre Kreda no família lulik no inviolável”.

“Kreda nu’udar inan, nunka abandona família, maski nia naksobu, kanek no hetan terus ho maneira barak. Bainhira família monu iha salan eh hadook an husi Kreda, nia sempre halo buat hotu atu tau matan ba família no kura nia, konvida nia ba konversaun no rekonsiliasaun ho Na’i”, Papa Francisco hateten.

Se ida-ne’e mak Kreda nia devér, Amu-Papa dehan, Kreda hasae orasuan lubuk ida, iha tempu hotu ba nia, atu bele kumpre misaun ida-ne’e. Tanba ne’e, Papa  Francisco propoin filafali atu sarani sira harohan orasaun ba Sínodu Bispu sira-nian kona-ba Família .

“Ita lansa filafali kompromisu ida-ne’e to’o fulan Outubru mai, bainhira sei realiza Azembleia sinodál ordinária dedika ba família. Ha’u hakarak atu orasaun ida-ne’e, nune’e mós dalan sinodál tomak, hetan forsa husi Bibi-Atan Di’ak ba nia bibi sira, liuliu ema no família sira ne’ebé, tan motivu oioin, sai “kolen no la hetan mahan, hanesan bibi sira lahó bibi-atan”.

Orasaun Sínodu Bispu sira nian kona-ba Família

Jezús, Maria no José

Iha imi ami kontempla

domin loos nia roman,

ba imi ami dirije ho konfiansa.

Sagrada Família Nazaré nian,

halo ami-nia família sira mós

sai fatin no senákulu orasaun nian,

eskola auténtika Evanjellu nian

no kreda doméstika ki’ik.

Sagrada Família Nazaré nian,

atu keta iha família ne’ebé moris esperiénsia

violénsia, taka an no divizaun nian:

ema ne’ebé hetan kanek eh enkándalu

simu lalais konsolasaun no kura.

Sagrada Família Nazaré nian,

Sínodu Bispu sira nian ne’ebé mai

bele hafanun hikas konxiénsia iha ema hotu

kona-ba karákter lulik no invilavel família nian,

ninia beleza tuir Maromak nia planu.

Jezús, Maria no José

Rona, atende ami-nia hamulak. Amen.