Família nia vulnerabilidade iha kondisaun atuál moris nian mak Papa Francisco nia tema katekeze iha kuarta, 3 Juñu. Nia aborda difikuldade ekonómika no sosiál oioin ne’ebé afeta família, hodi fó hanoin katak difikuldade sira-ne’e sai tebes duni “eskola umanidade” nian atu bele sobrevive ho dignidade ho moris mukit wain nune’e.

Download

Provasaun ida mak pobreza, ne’ebé afeta periferia sira iha sidade boboot sira nune’e mós iha zona rurál sira. Dala barak, situasaun agrava liután ho funu, ne’ebé tuir Amu-Papa Francisco nia mak “pobreza hotu nia inan”. Iha família kiak barak ne’ebé hatene lori moris ho dignidade, maibé, buat ne’e labele justifika indiferensa ba problema ne’e. Situasaun ne’e tenke aumenta moe basá sei eziste pobreza barak iha mundu.

“Kuaze milagre ida, atu haree katak, maski iha pobreza, família kontinua forma no konserva nia an – ho nia kbiit ne’ebé iha –  umanidade espesiál iha ninia relasaun sira (…) Ita tenke tuku tuur iha família sira-ne’e nia oin ne’ebé sai tebes duni eskola umanidade  nian ne’ebé salva sosiedade husi hahalok bárbaru sira”, nia afirma.

Papa Francisco temi mós problemátika relasaun entre família no ekonomia. No la’ós de’it kestaun ai-han nian, maibé serbisu nian, edukasaun no saúde.

“Ita sai komovidu ba beibeik bainhira ita haree imajen labarik sira-nian ho malnutrisaun no moras,  ne’ebé hatudu mai ita iha parte barak mundu nian. Tempu hanesan, komove mós ita atu haree labarik barak nia matan nabilan, ne’ebé buat hotu la iha, ne’ebé bá iha eskola kiak liu, bainhira hatudu sira-nia lapizeira no kadernu ho orgullu (…) Labarik sira-ne’e hatene katak ema la moris de’it ho ai-han”.

Amu-Papa fó hanoin sarani sira nia papél iha senáriu ne’e nia oin: besik ba família sira ne’ebé hetan prova, basá moris-mukit sosiál atinje família ne’e no dalaruma, harahun nia. Ne’e mak difikuldade sira mai husi falta serbisu eh serbisu ne’ebé la metin, kondisaun moris nian iha bairru sira ne’ebé kiak, ne’ebé terus problema uma nian, transporte nian, edukasaun no saúde.

Hamutuk ho problema materiál sira-ne’e aumenta tan danu ne’ebé pseudo-modelu sira konsumizmu nian lori ba família, liuhusi meiu komunikasaun nian, hodi influensia klase sosiál sira kiak liu no kontribui atu harahun lasu familiár sira.

Hasoru realidade sira-ne’e, Papa Francisco fó hanoin katak Kreda mak inan no labele haluha nia oan sira ne’e nia drama. Nia mós tenke sai kiak, Papa hateten, atu bele fó fuan no hatán ba moris-mukit ne’ebé boot ba beibeik. “Kreda kiak ida mak Kreda ne’ebé pratika simplisidade voluntária iha nia moris rasik – iha ninia instituisaun sira, iha nia membru sira nia estilu moris nian, atu hamonu muru hotu separasaun nian, liuliu kiak sira-nian. Ba ne’e presiza orasaun no asaun”.