FMA Fuiloro halo festa agradesimentu
Dili – Ho fuan agradese ami komunidade Madre Madalena Morano Fuiloro selebra festa agradesementu nian iha loron 16 Jullu 2015. Iha festa ne’e mak ami hasae hahi ba Maromak ba diak tomak ne’ebe ami simu durante tinan ida nia laran liu husi prezensa Irma ida-idak iha komunidade , kolaboradores, Professores, Foinsae &labarik sira ne’ebe ami hasoru iha ami nia misaun no mos Nai Lulik Salesiano sira ne’ebe nafatin disponivel ajuda ami iha vida spiritual no mos serbisu hamutuk ba foinsae sira nia diak. Ho lian ida ami hakarak hatoo “Harmonia iha Gratidaun” nee mak tema ba nia festa agradesimentu nian.
Molok atu tama ba festa agradesementu, ami komunidade deside hamutuk reza ba sira hotu ne’ebe kolabora ho ami iha ami nia misaun hodi nune’e Iha Nai nia naran bele hametin liutan uniaun ho Maromak ho Maluk sira no mos ema hotu.
Iha dader hahu kedas agradese ba Maromak liu husi Eukaristia Santa ne’ebe preside husi Padre Carlos Fernandes, Sdb. Iha nia omilia koalia kona leitura ne’ebe foti husi Saun Paulo nia surat ne’ebe dehan: isin lolon ida deit maibe iha liman ain barak. Ita hotu mak membru kreda nian ne’ebe harii iha Kristu. Iha evanjellu koalia kona ba uvas ne’ebe sai metin tanba iha hun ne’ebe metin. Hun nee mak Kristu rasik. Ita hotu mak nia sanak. Husi leitura sira fo signifikadu ba tema festa agraadesementu nian: iha pesoal ida-idak harii harmonia iha gratidaun
Iha lokraik Foinsae sira husi komunidade 3: Salesiano Lospalos no Fuiloro mai hamutuk iha komunidade Morano hodi reza orasaun hamutuk hodi agradese dala ida tan ba Maromak ba serbisu hamutuk iha tinan ida nia laran liu hamutuk lori foinsae sira ba dalan Santidade nian.
Hodi hametin liutan ami nia amizade ba malu, mak ami hotu partisipa hamutuk iha jantar no konviviu kalan nian hodi fahe ksolok ba malu nune’e bele hametin liutan ami nia amizade no fratenidade iha familia Salesiana
Ho fuan agradese nian ami hotu hatoo OBRIGADA, THANK YOU, GRAZIE, e TERIMA KASIH ba Maromak nia domin boot ba mai ida-idak.
(Ines Freitas)