Dili – Atu selebra tinan 25 prezensa FMA iha Balide no Bisentenáriu, komunidade organiza atividade sira hanesan Quiz B DB ba estudante Cristal no Foin-sa’e sira iha oratóriu.

Iha loron 07/08 sai hanesan loron ba foin-sa’e sira iha selebrasaun ida ne’e. Atividade ba loron ne’e mak kampu Don Bosco. Haree katak foin-sa’e sira iha interese boot atu koñese Don Bosco nia moris. Foin-sa’e sira kuaze na’in 200 ne’ebe partisipa iha Kampu ida-ne’e. Sira partisipa ativu tebes hahú husi rejistrasaun, “unfreezers”, jogu sira no iha reflesaun. Ita agradese ba Pe Natalino ne’ebé mai selebra Misa ba foin-sa’e sira, no iha kalan sira halo Taizé no mós konfesa.

Iha lorom 08/08/ mak loron importante tebes ba komunidade no ba foin-sa’e antigu/a oratorianu/a  no labarik sira, Irmán FMA husi Komunidade Dili laran, no belun sira, loos duni ema barak mai hamutuk ho komunidade hodi hasa’e Misa agradesimentu bá tinan 25 presenza FMA iha Balide no Bisentenáriu Don Bosco nian. Misa selebra husi Pe. Provinsiál SDB, Pe Virgilio do Carmo ho amlulik selebrante seluk. Iha reflesaun husi Pe. Virgilio, nia husu atu ita agradese Na’i ba bensan no grasa ne’ebé ita simu; agradese mós bele sai fali empeñu ida áatu kontinua karizma ne’ebé ita nia Irmán na’in tolu hahú kuda iha fatin ida-ne’e iha tinan 25 liuba. Iha Misa partisipa Me Provinsiál FMA  no  Ir Maria Letizia ne’ebé pioneira iha Komunidade ida ne’e.

Ba komunidade Balide. selebrasaun ida ne’e sai okaziaun ida: “Ami foti lia fuan tolu: 1. Haktuir katak ami konta tuir fali eventu sira ne’ebé mosu durante tinan 25 nia laran ho ksolok no hakfodak bainhira lee Cronaca sira. Haktuir hotu tiha mak mai momentu atu 2. Agradese: loos duni bainhira ita rona istória no esperiénsia iha komunidade ida-ne’e ami tenki agradese iha momentu Misa depoizde orasaun, ami hananu ami-nia Magnificat hodi agradese Na’i-Feto ne’ebé halo buat hotu iha komunidade ida ne’e. No lia fuan ikus mak 3. Empeñu: ita nia kompromisu atu empeña an atu bele kontinua ho kriatividade no laran-manas Karizma ne’ebé ita nia Irmán sira hahú iha tinan 25 liubá”.

Komunidade-Balide