Dili – Volontária Don Bosco nian (VDB) mak leiga konsagrada sira, hola parte nu’udar membru Família Saleziana nian. Sira esprime sira-nia saran an ba Maromak no maun-alin sira ho modu konkretu  ho profisaun votus sira kastidade, pobreza no obediénsia, hodi halo sai vizivel buat di’ak ne’ebé halo iha mundu ho silénsiu.
Iha sira-nia moris sira fahe kolen serbisu loroloron nian nu’udar meiu subsisténsia nian, atu favorese promosaun umana no sarani, justisa sosiál, santifikasaun pesoál.

 

Sira moris tuir espíritu Don Bosco nian iha estilu sekulár tuir sira-nia karizma: sira kompromete an iha serbisu ho modu kriativu no matan moris atu iha fatin sira serbisu bá sira bele prevene deskonfortu, alienasaun no salan.  
Institutu sekulár VDB moris iha Torino iha 1917 husi Beatu Filippo Rinaldi nia fuan boot no ohin loron sira horik iha mundu tomak. Sira la hatudu an no mantein rezerva ho prudénsia kona-ba sira-nia konsagrasaun atu bele sai “fermentu iha maun-alin sira-nia leet” no ko’alia ba sira ka evanjeliza ho sira-nia moris rasik.

Iha Timor-Leste no Indonézia mós iha ona aspirante no konsagrada temporária ruma. Defaktu iha loron 5 nia laran, irmán na’in rua, Simoa no Marcelina halo sira–nia retiru espirituál anuál iha Comoro, Dili, ho fasilitadora irmán Jacinta G., FMA. Sira-nia tema retiru nian mak “Iha Na’i mak ha’u-nia bee-matan hotu” (Salmu 87, 7). Íkone bee-matan lori atu hakle’an Evanjellu João 4, 1-42, kona-ba Jezús nia enkontru ho feto Samaria nian. Subtópiku sira tema nian maka: 1) Introdusaun ba Ezersísiu espirituál: tempu atu halakan fali entuziazmu ba dalan santidade nian; 2) Hakat ba bee-matan; 3) Kristu nia roman leno ita-nia nakukun sira; 4) Kristu nia fuan: bee-matan moris nian; 5) Husik Kristu evanjeliza an rasik atu bele evanjeliza ema seluk.

Ezersísiu espirituál remata ohin loron 7 Dezembru, ho renovasaun promesa sira ka votus kastidade, pobreza no obediénsia iha irmán Paolina Yip nia liamn, responsavel VDB rejiaun Ázia nian. Iha Timor-Leste asistente ba VDB sira mak Padre Manuel Fraile sdb.