Dili – Ohin loron ikus ba oratorianu sira atu halibur iha oratóriu Eusebia Palomino (Comoro). Sira atus haat resin halibur iha jináziu hanesan domingu-domingu. Maibé ohin liuliu atu selebra Natál hamutuk molok ba feriadu ba seman tolu. Labarik barak haksolok atu mai tanba ohin sira sei simu prezente ba Natál, maibé ho prioridade ba sira ne’ebé marka prezensa beibeik iha oratóriu. Se sira marka prezensa fiél sira iha prezensa 24  iha tinan 2012. Entre oratoriana/u sira iha menina ida de’it mak marka prezensa hodi la falta. Nia mak Remígia.

 

Hotu tiha kumprimenta malu ho kanta no dansa, irmán Gianna fó buon giorno hodi konvida oratorianu sira atu prepara an didi’ak ba simu Jezús iha Natál ho hahalok di’ak sira. Hafoin sira reza hamutuk. Tuir mai irmán Jacinta de Deus fó avizu kona-ba lala’ok atu hili sira-nia prezente hanesan mini-bazár ida no fó avizu katak oratóriu sei hahú fali tinan oin iha loron 13 Janeiru.

Ikusnian sira ne’ebé merese, forma hodi ba hili sira nia prezente iha sala ida: iha boneka oioin, brinkedu kareta nian, pasta, flauta, faru, bola, sapatu nst. Labarik barak mak hili prezente la’ós ba sira-nia an rasik maibé ba sira-nia alin sira.