Fuiloro – Tema ba loron daruak no datoluk nian mak ”VIAJEN HO DON BOSCO”. Iha selebrasaun Eukaristia loron daruak nian prezide husi padre Transfigurasan SDB. Iha homilia padre halo esplikasaun kona ba evanjellu ne’ebé ko’alia kona-ba to’oa-na’in ne’ebé konvida servisu-na’in sira iha oras la hanesan. Balun hahú servisu iha dadeer tuku ualu, balun meiudia no seluk tan iha lokraik oras tuku lima, ho kontratu hosi to’os-na’in katak loron ida selu dolar ida ba hotu hanesan. Maibé akontese katak balun hahú murmura tanba servisu husi dadeer nune’e sira hanoin atu simu barak liufali sira ne’ebé servisu de’it oras ruma iha lokraik ne’e. Padre hatutan tan, hahalok ida laran-moras no murmura-dor ne’e keta tama iha ita foin-sa’e sira tanba sei estraga ita-nia moris. Maromak husu mai ita atu servisu ho kualidade no profisionalizmu. Maromak Nia laran-luak ne’e oferese ba ema hotu ne’ebé hakarak simu konvite atu bele ba servisu iha ninia to’os.

Iha oras tuku 9.00 dadeer mak hahú atividade formasaun nian, iha ne’ebé grupu ida-idak komesa halo viajem ba fatin tolu : COLLE, CHIERI NO  VALDOCCO. Besik oras haat nia laran animadór/a sira partisipa ho entusiasmu tebes iha formasaun, reflesaun, sharing no asembliea. Kada grupu -ida halo kompromisu tuir grupu nia presiza iha ne’ebé sei aprezenta iha loron aban iha momentu MANIFESTO nian. Kompromisu  ne’e sei sai nu’udar bukae ne’ebé animadór/a sei lori fila ba sira-nia fatin ida-idak hodi tau iha prátika. Iha lokraik komesa fali viajem hodi halo rotasaun ba fatin seluk. Iha tempu orasaun lokraik nian, hahú ho “Living Rosary” responsavel husi joven sira komunidade FMA no SDB Baucau, hafoin kontinia ho vésperas no adorasaun Santisimu husi komunidade Eusebia Comoro. Depoizde han-kalan iha tan “cultural night” ne’ebé husi komunidade ida-idak aprezenta buat ne’ebé sira prepara ona.