RV – Iha katekeze kuarta, loron 12, Amu-Papa fó hanoin katóliku sira kona-ba importánsia atu keta haluha Maromak nia hahalok iha istória umanidade tomak, husi Adaun no Eva hodi to’o iha ninia tutun ho Jezús Kristu, ne’ebé to’o ohin mós sei atua. Tuir Amu-Papa, halo memória kona-ba Maromak nia asaun no rekoñese etapa sira revelasaun nian iha istória, ne’ebé hakerek iha Sagrada Eskritura, fundamentál ba dalan fiar nian.

Asesu kópia ho lia-portugés

 

“Ita-nia fiar hetan ai-han hodi deskoberta no memória Maromak ida nafatin fiél, ne’ebé lori istória no sai fundamentu seguru no estavel atu harii moris rasik.”

 

Bento XVI afirma katak Sagrada Eskritura mak fatin privilejiadu atu deskobre etapa sira Revelasaun Maromak nian no konvida katóliku sura atu, iha Tinan Fiar nian ida-ne’e, kaer Bíblia iha liman atu lee no medita nia no tau atensaun boot liután ba Leitura iha Misa domingu nian, halo nia sai ai-han kamurak ba fiar.

Hodi fó hanoin kona-ba Tempu Litúrjiku Adventu nian, ne’ebé prepara Igreja ba Natál, Amu-Papa esplika katak iha Maromak nia Liafuan mak bele komprende mistériu Maromak nian ne’ebé hakonu tempu ida-ne’e. “Maromak hakat liu ninia Lalehan no hiit an mai hasoru ema; Nia halo aliansa ida no nia no tama iha istória povu ida nian.”

Amu-Papa taka katekeze hodi konvida katóliku sira atu uza Adventu nu’udar oportunidade ida atu hanoin Maromak nia hahalok hotu halo iha istória salvasaun ema nian.

“Adventu konvida ita atu halo dalan prezensa ne’e nian no fó hanoin nafatin katak Maromak la sai husi mundu, la auzente, la husik ita mesak, maibé mai hasoru ita ho modu oioin, nune’e ita presiza aprende atu dixerne”.

Hotu tiha audiénsia, Amu-Papa inaugura ninia konta iha twiter ho tablet ida iha liman. “Belun doben sira, ho ksolok ha’u hamutuk ho imi liuhusi Twitter. Obrigadu ba imi-nia resposta laram-luak nian. Ha’u fó bensan ba imi hotu ho fuan tomak”. Iha ninia twitt dahuluk nia iha ona follower millaun 1.5.

Pergunta dahuluk nia hatán mak “oinsá moris Tinan Fiar nian iha moris loroloron?”. Amu-Papa hatán: «Dialoga ho Jezús iha orasaun, rona Jezús ne’ebé ko’alia iha Evanjellu, hasoru Jezús iha ema sira ne’ebé presiza».

Amu-Papa nia prezensa iha Twitter reprezenta nia lian nu’udar unidade no matadalan ba Kreda, maibé sai mós konvite urjente ba sarani sira atu esprime sira-nia “lian”, atu envolve sira-nia “follower” no belun sira, atu fahe ho sira esperansa ida Evanjellu nian ne’ebé ko’alia kona-ba Maromak nia domin lahó kondisaun ba mane no feto ida-idak.

Santu-Padre nia tweets publika ho lia oioin: españól – @pontifex_es ; italianu – @pontifex_it; portugés – @pontifex_pt; alemaun – @pontifex_de; polaku – @pontifex_pl; árabe – @pontifex_ar; fransés – @pontifex_fr.