Ossú – Katekista na’in 380 halibur iha parókia Sta. Teresinha do Menino Jesus – Ossú, fatin komunidade SCMM, halo sira-nia formasaun husi loron 12 Dezembru loraik to’o loron 15 Dezembru dadeer. Irmán Maria Filomena Soares, fdcc  nu’udar  koordenadora komisaun katekétika dioseze Baucau nian konvida katekista hotu husi parókia no kuaze parókia sira atu bele hakle’an sira-nia formasaun (permanente) ho tema Evanjelizasaun foun no tranzmisaun fiar nian, hanesan Kreda universál konvida durante Tinan Fiar nian ne’ebé hahú tiha ona iha loron 11 Outubru 2012 no sei remata loron 24 Novembru 2013.

 

Iha oráriu haktuir tópiku oioin hanesan tuirmai ne’e:

• As Igrejas locais  como agente da transmissão da fé (Dom Basílio)
• A Igreja transmite a fé  (Pe. António Gonçalves)
• Palavra de Deus e transmissão da fé (Pe. Mário Cabral)
• Iniciar a fé educar para a fé (Pe. Evaristo da Costa)
• Novas formas de ser Igreja em Timor-Leste (Pe. Francisco Pinheiro)
• Urgência de uma Nova Evangelização – dever de Evangelizar (Pe. José Gonzaga)
• A alegria de evangelizar (Irmãn Jacinta Gusmão fma)
• Os frutos da fé (Irmãn Maria Filomena)

Irmán Jacinta Gusmão iha ninia intervensaun hahú ho dinámika ida hodi uza símbolu ruma:

• Fatuk: problema, laran-susar, barreira sira iha dalan evanjelizasaun nian
• Aifunan: grasa sira ne’ebé simu no ksolok sira.
• Pasajen bíblika: se sira tulun iha imi-nia dalan ka dehan buat ruma ba ita-nia fuan.
• Ain-fatin: sá mak dudu ita iha dalan fiar nian, iha dalan hasoru Maromak, iha misaun evanjelizasuan nian.

Durante sira-nia partilla fahe iha grupu tuir distritu/parokia, sira fasil liu atu identifika problema sira, ne’ebé kuaze hanesan iha distritu hotu, maibé difisil atu haree ksolok no grasa sira. Maski nune’e sira hotu hatudu konviksaun atu kaer metin Maromak nia Liafuan nu’udar fonte no fundamentu ba sira-nia moris no pregasaun hodi kontinua ba oin atu hakle’an sira-nia espiritualidade tanba fiar no konviksaun iha mandatu evanjelizasaun nian husi Jezús Kristu rasik no hodi Espíritu Santu nia tulun hodi haka’as an atu moris iha Maromak nia domin.

Katekista sira hatudu interese maka’as atu hakle’an tema sira ne’e no mós durante tempu diálogu nian ho palestrante sira, sira halo mós pergunta barak kona-ba moris konkretu fiar nian no problema atuál sira ne’ebé Kreda enfrenta.