Husi irmán Esmeralda Soares fma

Dili – Komunidade Novisiadu FMA hala’o merkadu baratu ohin dadeer, iha salaun novisiadu nian. Objetivu ba atividade ida ne’e mak hetan sustentu ba komunidade, tanba komunidade novisiadu mak uma formasaun ne’ebé la iha income.

Liuhusi atividade ida-ne’e ami bele ajuda liu-liu ba ema sira ne’ebé la hetan oportunidade sosa sasan ne’ebé folin a’as. Defaktu, ema sira be mai ne’e kontente ho buat ne’ebé ami fa’an no la kleur de’it sasán barak konsege fa’an hotu.

 

Iha 2012 ami hala’o ona merkadu baratu dala rua. Ami hili atu loke iha momentu rua ne’ebé importante tebes: festa Maria Ausiliadora no festa Imakulada.

Momentu rua ne’e iha objetivu mós atu hametin sarani sira nia domin no devosaun ba Maria.

Ida-ne’e maka merkadu ba dala tolu ona, molok selebra loron boot Jezús nia moris. Iha atividade ida-ne’e ami komunidade sente kontente no agradese ba komunidade no benfeitór sira ne’ebé ho  laran-luak fó sira-nia kontribuisaun ba ami atu bele loke merkadu baratu ida ne’e.

Ami iha komunidade sente forte liu iha espiritu familia nian ne’ebé tulun atu harii liuliu uniaun entre ami hodi kolabora hamutuk hodi realiza ami-nia atividade.

Ami nia mensajen ba komunidade ida-idak, atu bele kolabora ho ami nafatin tanba ami sei loke nafatin merkadu baratu ida ne’e ba tinan-tinan….keta haluha iha providénsia ruma karik haruka mai ami iha tinan nia laran.

Maria Tulun-Na’in, ita hotu nia Inan fó bensa nafatin ba imi hotu nia laran-luak.