Dili – FMA ho votus perpétua sira halibur hamutuk horisehik iha Dili, durante loron tomak ne’ebé fahe ba parte 4: selebrasaun eukarístika (padre Jojo sdb);  konfronta itineráriu formativu hodi hili konteúdu ba formasaun iha 2013; diskute kona-ba kritériu komún ruma inspetoria nian no; kumprimenta Dom Basílio do Nascimento.

 

Durante selebrasaun eukarístika, irmán Paola entrega lilin fiar nian ba komunidade ida-dak no itineráriu formativu ba irmán sira. Padre Jojo iha ninia omilia konvida irmán sira atu asimila atitude Jezús nian ne’ebé maski Maromak “boot” halo an sai ki’ik. Atitude sai ki’ik ne’e ema susar liu atu ema simu, hafoin hetan tiha independénsia.

 

Hodi haree sira-nia itineráriu formativu, liuliu tema sira aprofondimentu nian ba tinan oin, grupu ida-idak tuir ninia etapa hamutuk haree sira-nia itineráriu formativu hodi hili sira-nia tema formasaun nian ba 2013. Grupu idade adulta dahuluk hili ba sira-nia konteúdu formasaun dimensaun fiar no dimensaun karizmátika. Sira hateten katak, ohin loron presiza hatene didi’ak fiar no kultura atu bele hala’o evanjelizasaun. Grupu idade média hili konteúdu kona-ba koñesimentu mudansa biopsikolójiku no vida espirituál hodi hakle’an dixernimentu no akompañamentu.

Diskusaun kritériu sira-nian lori atu reflete fali Konstituisaun sira hodi haree motivasaun sira ba vizita iha família, ba feriadu, ba uzu sasán sira-nian, nst. Husi diskusaun, irmán barak salienta katak Konstituisaun mak tenke regula ita-nia hilin sira no to’o agora Insitutu nafatin favorese atu ligasaun ho familia raan nian kontinua metin no vizita ba família nia motivasaun mak karidade. Irmán Paola konvida atu irmán perpétua sira sai sasin loos iha fidelidade ba Konstituisaun, hodi tranzmite ba irmán juinora sira espíritu Mornese no salezianu ne’ebé loos.

Ikusnian Dom Basílio mai to’o Centro de Formação João Paulo II iha-ne’ebé FMA sira halibur. Irmán Paola husu nia atu fahe uitoan kona-ba Sínodu. Nia dehan katak dezafiu boot ba Kreda iha mundu maka família, joven sira no formasaun kleru no konsagradu sira-nian. Atu taka irmán sira hato’o “Natál kmanek” ba nia ho knananuk ruma.