Ita iha hela novena ba Maria Ausiliadora nia laran. Iha parókia Maria Ausiliadora, Comoro, loraik-loraik tuku neen iha novena ba parokianu hotu. Ba FMA sira tempu preparasaun ba festa mariana mak oportunidade atu habelar domin ba Jezús nia Inan nu’udar parte preparasaun nian ba selebrasaun tinan 25 prezensa FMA nian iha Timor-Leste, iha 2013 mai.  Dalan preparasaun ne’e hotu halo ho Maria:  Inan,  Mestra no Gia. Ita halo ho  Maria, Jezús nia Inan tanba nia mak iha Kreda nia istória sai faról ida, ne’ebé hatudu lurón loos atu moris Maromak nia futar Liafuan: Feto sín nian husi anunsiasaun to’o Kalváriu, to’o Jezús nia moris-hi’as. “Maria mak –hanesan Don Bosco dehan –halo buat hotu”. Oinsá mak ita halo preparasaun tinan 25 ne’e ho Maria, nune’e hamutuk ho Nia moris tuir Maromak nia Liafuan?

 

Uluknanai valoriza festa mariana hotu atu –hanesan dehan ona –  habelar domin ba Jezús nia Inan. Ida-ne’e halo hodi lori ilas Maria Tulun-Nain nia ba família sira. Lori Maria nune’e dehan katak valoriza liután relijiozidade populár ne’ebé Maria rasik husu iha ninia aparisaun sira katak: Rozáriu. Dalan seluk hodi mós loke mini-bazár imajen sira Maria nian, objetu relijiozu sira kona-ba Maria Tulun-Nain ho presu baratu. Nune’e iha loron hirak novena nian, Maria Tulun-Nain nia devotu sira haree iha kreda Maria Ausiliadora-Comoro nia oin objetu relijiozu marianu sira molok novena hahú. Aleinde ne’e sei iha oportunidade atu haklaken kona-ba Maria nia moris liuhusi “Quiz marianu”, kampu marianu nst.

 

Iha fulan Maiu ne’ebé signifikativu tebes ba ema barak maibé liuliu ba Família Saleziana ne’ebé selebra Maria nu’udar Ausiliadora, mai ita sai badinas liután lori Nai-Feto ba ita-nia maun-alin sira no hamutuk ho sira hariku ita-nia loron sira ho Ave Maria basuk. “Bainhira ita reza Rozáriu Maria oferese mai ita ninia fuan atu ita kontempla nia Oan Jezús Kristu nia moris. Nia mak ita-nia roman, ita-nia esperansa no ita-nia moris” (Bento XVI, Lourdes, 13-Setembru 2008).

Se ita ba Maria ita sei to’o duni bá Jezús.