RV – Iha audiénsia jerál, kuarta 3 Fevereiru, Papa Francisco kontinua ninia katekeze kona-ba mizerikórdia: Maromak laran-sadia rohan-laek, no Maromak justisa perfeita nian – oinsá tau hamutuk buat rua ne’e? – Santu Padre husu.

Tuir Papa Francisco la iha kontradisaun ida, tanba mizerikórdia lori atu kumpre justisa loos. Defaktu, eziste tipu ida justisa nian, retributiva, ne’ebé haruka fó ba ema ida-idak buat ne’ebé ninian, ne’ebé lori atu kondena ema nee’bé halo delitu ida. Maski nune’e, la’ós justisa perfeita, basá la manán aat, apenas tahan nia atu avansa ba oin.

Download

Iha Bíblia – Amu-Papa dehan – ita aprende modu seluk atu halo justisa. La’ós liuhusi punisaun, maibé perdaun ne’ebé apela ba konxiénsia, atu lori ba konversaun. Ema ne’ebé simu ofensa hadomi ida-ne’e ofensde/kulpadu no hakarak salva nia. Ne’e dalan difisil ida maibé posivel, porezemplu, nu’udar modu rezolusaun konflitu sira-nian iha família:

“Modu atu rezolve konflitu sir aiha família ne’e, iha relasaun sira kazál nian eh entre inan-aman no oan sira iha-ne’ebé ida ne’ebé simu ofensa hadomi ida ne’ebé ofende no hakarak salva relasaun ne’ebé liga ba ida seluk”.

“Loos duni, ne’e dalan ida difisil. Ezije atu ema ne’ebé sofre ofensa ida prontu atu perdua no hakarak ema ne’ebé ofende nia, ninia salvasaun. Maibé nune’e de’it mak justisa bele triunfa, tanba, se kulpadu rekoñese buat aat nia halo no husik atu halo, ne’e katak la eziste ona buat aat no buat ne’ebé injustu sai justu, tanba simu perdaun no tulun atu hetan fali dalan di’ak nian”.

Nune’e mak Maromak halo ho ita, ho ninia fuan Aman: ninia justisa mak ninia perdaun – Papa Francisco subliña.  Iha Jezús, mizerikórdia sai isin no justisa loos nian alkansa plenitude: ita simu perdaun, ita bolu Maromak nu’udar Aman no, tanba ne’e, ita tenke perdua sira ne’ebé ofende ita hanesan Nia perdua.

Iha finál katekeze nian, Santu Padre dirije liafuan ida ba amlulik sira ne’ebé simu sarani sira iha konfisaun, hodi hameno sira atu halo ida-ne’e ho fuan Aman nian.