Madre Yvonne ba antiga/u aluna/u sira

Sam Phran (Tailándia) – Madre jerál ohin hasoru antiga/u aluna/u sira. Iha enkontru ida ne’e iha reprezentante husi Tailandia tomak, maibé liuliu husi uma sira iha Sam Phran no Bangkok; entre sira hotu, grupu forte ida mak matan delek sira ne’ebé simu edukasaun husi irmán sira.

Enkontru hahú hodi lee surat husi Prezidente Mundiál Antiga/o Aluno/a sira, senhora Maria Maghini ne’ebe agradese Madre ba ninia “hateken, ne’ebé hamnasa midar ho ternura, ne’ebé Madre fó nu’udar prezente ba ema hotu”.

Tuir mai, Prezidente AA iha Tailandia agradese tan Madre nia laran di’ak no laran sadi’a ne’ebé nia hatudu liu husi ninia hamnasa midar. Agradesimentu sira kontinua ho AA matan delek ne’ebé hato’o ninia agradesimentu ho lia Franses, hafoin grupu ida-idak aprezente ninia prezente ba festa ida ne’e.

Madre hatán ba sira ho liafuan ruma, ne’ebé bele lee tuir mai:

“Hasoru AA mak enkontru família nian nafatin; AA mak ema ne’ebé besik liu FMA sira, tanba sira sai boot iha ambiente salesianu, nune’e, imi mak salesianu, imi iha espíritu dBosco no M. Mazzarello nian.

Espíritu ida ne’ene’ebé imi simu durante tempu edukasaun nian, kontinua buras iha imi laran. Ida ne’e hanesan moris ne’ebé imi simu no imi iha bolun atu halo buras iha imi-nia moris tomak…

Moris nu’udar AA la’ós buat ruma “pasadu nian”, hodi hanoin hetan buat ne’ebé uluk nian no forma ita-nia moris. Espíritu salesianu ne’ebé imi simu tulun imi atu moris ohin, imi presiza kontinua hakle’an, haburas, fahe ho ema seluk espíritu ida ne’e. espíritu salesianu mak kontajouzu (hada’et) tanba simpatiku no ema barak bele gosta.

Espíritu ida ne’e mak prezente Maromak no Maria Auxiliadora nian, maibé mós responsabilidade atu moris valór sira ne’ebé imi hatene no simu…

Imi hakarak dehan katak edukasaun mak importante liu. Don Bosco komprende katak bele hafoun sosiedade ida husi foin-sa’e sira, don Bosco komprende katak atu eduka presiza tau hamutuk ema hotu nia forsa (FMA, SDB, kooperadores, AA, foin-sa’e sira…). Sinerjia ida ne’e mak kbiit ida ne’ebé ohin loron presiza…

Oras ne’e famíliamak hetan difikuldade, maibé AA bele tulun. Ne’e “toos” ida iha ne’ebé AA sira bele dezenvolve sira nia misaun: fó atensaun, tau matan ba família sira no ba foin-sa’e sira ne’ebé hetan difikuldade… ita presiza servisu hamutuk, imi mak kontinua irmán sira nia servisu iha mundu, se imi fahe imi-nia empeñu ita bele halo buat barak iha sosiedade ida ne’e.

Ha’u fó aten-barani ba imim atu hasoru hamutuk dala barak, hodi haree saida mak bele halo atu bele to’o ema sira ne’ebé hetan difikuldade no ema seluk la to’o ba sira. Konsellu Jerál tinan tinan halibur ho imi-nia Konfederasaun Mundiál, konsellu inspetoriál bele halibur ho imi-nia nivel Inspetoriál, maibé importante mós halibur hamutuk iha nivel lokal hodi buka oinsá kolabora, oinsá, hamutuk, bele to’o ba foin-sae sira ne’ebé presiza edukasaun. AA mak grupu ne’ebé boot liu iha FS, tan ne’e ita presiza koordena malu.

Ha’u fó aten-barani ba imi atu kontinua ho “buti ha fuan no liman iha mundu”… imi lori ksolok ba mundu, ksolok salesianu, ksolok ne’ebé ita iha tanba ema hadomi ita, tan ne’e ita bele fó esperansa, ita fiar katak ita bele harii futuru tanba Maromak prezente iha mundu no Maria Auxiliadora hamutuk ho ita nafatin. Foin-sa’e sira presiza adultu sira ne’ebé lori esperansa, tan ne’e imi hada’et bá esperansa ba foin-sa’e sira.

Imi-nia moris mak importante ba FS, maibé mós ba Kreda no ba mundu….

Ita presiza simu ema hotu, maski ho fiar la hanesan, maibé ita hotu belun, tanba ita fahe valór hanesan no ita hotu buka ema nia di’ak, maski ita la hanesan, maibé ita iha espíritu ida de’it….

Ha’u hanoin katak AA iha misaun espesiál iha Asia. Uluk irmán sira tulun imi, maibé se oras ne’e ita hakarak kontinua, presiza forsa foun: ha’u husu ba imi atu tulun foin-sa’e sira atu deskobre Maromak nia lian (hodi kolabora ho irmán sira): Maromak mak bolu maibé ita presiza tulun foin-sa’e sira atu rona ninia lian.

Tan ne’e, ha’u konvida ona irmán sira atu loke oratóriu ida, hamutuk ho foin-sa’e sira, iha fatin periferia nian, no ha’u dehan ba sira katak bele husu tulun ba imi, tanba imi disponivel nafatin! Imi buka ideia hamutuk, imi buka fatin sira iha ne’ebé foin-sa’e sira presiza.

Ha’u saran imi iha Maria Auxiliadora nia liman”.

(Alma Castagna)